Ana Elordi ondarrutarra, Gabonetako loteriaren iragarkiko protagonistetako bat
Ipuin kutsua duen iragarkian parte hartzea esperientzia "oso polita" izan dela esan du ondarrutarrak. Espainiako Loteriako abenduaren 22ko zozketa iragartzeko ikus-entzunezkoan Saioa Lara markina-xemeindarrak ere parte hartu du; jantzi diseinuagaz arduratu da.
Espainiako Gabonetako loteriaren iragarkia telebistan ikus daitekezkeen iragarkien artean garrantzitsuena bihurtzen da urteko sasoi honetan; milioika pertsonak ikusten dute urtero iragarkia. Jon Garañok, Jose Mari Goenagak eta Aitor Arregik zinemagileek zuzendutako iragarkian hainbat euskal aktorek parte hartu dute, eta horien artean da Ana Elordi Aristondo ondarrutarra. Beragaz batera aritu dira, besteak beste, Mila Espigas, Itziar Aizpuru, Patxi Perez edo Pako Revueltas aktore ezagunak. Saioa Lara markina-xemeindarrak ere parte hartu du proiektuan; jantzi diseinuaz arduratu da.
Lagun ikusezina dabil Baztanen, herritarren artean loteria txartelak ezkutuan banatzen. Horra aurten Espainiako Loteriaren iragarkiak kontatzen duen istorioa. Euskaraz, katalanez, galegoz eta gaztelaniaz emititu den iragarkian ikus daitekeenez, zortea partekatu nahi duten pertsona misteriotsuen dezimoak jasotzen dituzte bizilagunek. Amparo fruta dendako langilearen pertsonaia hezur mamitu du Elordik. “Ni agertzen naizen fruta denda oso polita zen. Sasoi bateko Kaleandiko dendak etorri zitzaizkidan burura. Muntaia handia izan da eta oso lan zaindua iruditu zait”.
Aktore ondarrutarrak azpimarratu duenez, esperientzia “oso polita” izan da. “Ni orain irakasle modura nabil lanean, baina holako gauzak egiten ditudanean benetan konturatzen naiz zenbat gustatzen zaidan antzezpena. Publizitatea, berez, ez da nire arlo gustukoena, baina hautaprobetan iragarkia Garañok, Goenagak eta Arregik egin behar zutela esan zidatenean baiezkoa eman nuen; lan honetan parte hartzeko amua izan zen niretzat. Egia esan, eurekin batera lan egiteak sekulako ilusioa egiten zidan”
Urriaren bigarren hamabostaldian grabatu zuten, eta aktoreei ez zieten esan zer iragartzeko zen lana
Lau egunetan filmatu zuten iragarkia, eta ondarrutarrak egun batean grabatu zuen bere lana. “Filmatzean oso gustura eta eroso egon nintzen; ondo pasatu nuen. Aktore guztiok ez genuen batera lan egin, izan ere, bakoitzak bere eszenak zituen. Nik Gemma Martinezegaz egin nuen lana, iragarkiaren hasieran agertzen den pertsonaiaz. Filmatzea bera magikoa izan zen. Lan hori hurbiletik ikustea asko gustatu zitzaidan”.
Ana Elordi Gabonetako Loteriaren iragarkia grabatzen. Argazkia: Ana Elordi.
Urriaren bigarren hamabostaldian Elizondo eta Iruritan grabatu zituzten irudiak, eta orduan ez zieten esan zer iragartzeko zen lana; zuzendariek eurek ere ezin izan zieten aktoreei ia ezer argitu. “Sekulako sekretismoa egon da, izan ere ez zuten nahi inork ezer jakitea; argi-argi ezin izan ziguten ezer esan eta nik, behintzat, sekulako jakin mina nuen. Proiektua hasiera batean turroien iragarki bat grabatzeko zela esan ziguten. Hautaprobetan gero, grabatu nuen eszenaren antzekoa grabatu genuen, eta hor bati papel bat sartu behar nion poltsikoan; hori ikusirik amua ezpainean geratu nintzen”.
Aurreko eguenean [azaroak 11] estreinatu zuten iragarkia, eta ordutik dozenaka mezu jaso ditu mugikorrean. “Jaso ditudan mezu guztiak oso politak izan dira. Aspaldi egon gabeko hurrekoen whatsapp mezuak jaso ditut egunotan eta ikasleek ere orain beste era batera begiratzen didate. Inguruko batzuek txantxetan ea zer zenbaki egokituko den esateko ere eskatu didate”.
