Elikagaien Bankuek urteko bilketa nagusia egingo dute egunotan
Bonu eta banku transferentzia bidez egingo dute bilketa aurten. Boluntarioak behar dituzte Markina-Xemeinen.
Urtero modura, Gabonen atarian, urteko bilketa nagusia egingo dute Bizkaiko eta Gipuzkoako Elikagaien Bankuek. Kanpaina barikuan [azaroak 19] abiaraziko dute eta hilaren 25era arte luzatuko da. Udalerrietako denda eta saltokien parte hartzeari esker, bilketa Lekeition, Markina-Xemeinen eta Mutrikun egingo dute; nahi duten pertsona guztiek laguntzeko aukera edukiko dute beste urte batez.
Markina-Xemeinen eta Lekeition, esaterako, iaz bezala, banku transferentziaren bidez edo bonuaren bidez lagundu ahal izango da. Boluntarioak egongo dira barikuan [azaroak 19] eta zapatuan [azaroak 20] herriko merkataritza guneetan kanpainaren berri emateko. Markina-Xemeinen boluntario modura laguntzeko prest daudenei 634 44 35 35 telefono zenbakira deitzeko eskatu diete.
Mutrikun, berriz, bilketa Eroski denda berrin, Eroski Arrietan eta Dian egingo dutela zehaztu dute. “Aurten ere bonu bidez egingo dugu bilketa. Bakoitzak nahi besteko diru kopuruarekin lagundu ahal izango du. Mutrikuarrak bonuak eskuratzera animatu nahi ditugu. Aldi berean, urtez urte gure kanpainetan erakutsitako elkartasuna eskertu nahi genuke. Eskerrik asko bilketan parte hartzen duzuen saltokiei eta boluntarioei egindako lanagatik eta emandako laguntzagatik”.
