Mutriku-Deba zubia hiru hilabetez itxita egongo da lanengatik
Azpiegitura astelehenetik [azaroak 22] aurrera egongo da itxita. Urazamendik kalean bizi diren bizilagunentzat zubia funtsezko igarobidea denez, autobus zerbitzuan deskontuak izango dituzte.
Mutriku eta Deba batzen dituen zubia zubia desmuntatu eta berreraikitzeko bigarren faseko lanak azken fasean sartzear daude. Lanok egiteko, baina, zubia itxi egingo dutela jakitera eman du Mutrikuko Udalak; azpiegitura astelehenetik [azaroak 22] aurrera egongo da itxita. Aldundiak eginiko aurreikuspenen arabera, lanok hiru hilabeteko iraupena edukiko dute. Obrek iraun bitartean, beraz, oinezkoen pasabidea itxita egongo da.
Zubiaren alde batean zein bestean bizi direnen egunerokoan eragin nabarmena edukiko dute lanek. Mutrikuko Urazamendik kalean bizi diren askok eta askok, esaterako, Deban lan edo ikasten dute. Ibaia oinez gurutzatu nahi baldin badute, Errotazarreko zubia gurutzatu beharko dute, horrek dakarrek arriskuarekin. Bestelakoan, garraio publikoa edo pribatua erabili beharko dute.
Urazamendik kalean bizi diren bizilagunentzat zubia funtsezko igarobidea denez, autobus zerbitzuan deskontuak izango dituzte. Kaltetutako bizilagun horiek Mugi txartelan bonua aktibatzeko aukera edukiko dute. “Birkarga egitean aktibatu zaie bonua”. Erabiltzaileek, horretarako, Mugi txartelean alta eman beharko dute, honako lekuetan: Mutrikun, Correos, Sabina, Virginia eta Kutxabank kutxazainean eta Deban, Correosen. Interesatuek, ondoren, Mutrikuko edo Debako udaletxeetan altaren berri eman beharko dute. “Izen-abizenak, Nortasun Agiria eta Mugi zenbakia eskatuko dira horretarako”.
Apirilaren 14an hasi zuen obra Moyua-Harri alde baterako enpresa elkarteak eta hamar hilabeteko epean amaituta egotea aurreikusten dutela esan du Gipuzkoako Foru Aldundiak.
