Mutrikun ozen salatu dute herriko emakume batek jasandako eraso matxista
Manifestazio jendetsua egin dute gaur [azaroak 18] Mutrikuko kaleetan zehar asteburuan herriko emakume batek jasandako eraso matxista salatzeko. Mutrikuko Udala: "Indarkeria matxistarekin amaitzea jendarte osoaren ardura eta erantzukizuna da".
Ehunka herritar batu dira gaur [azaroak 18] 19:00etan Goiko Plazan asteburuan herriko emakume batek jasandako eraso matxista salatzeko; mutrikuarrez gain, inguruko herrietako bizilagunak ere protestara batu dira. Goiko Plazan batuta, manifestazioa egin dute, eta indarkeria matxistaren aurkako mezuak ozen oihukatu dituzte. Oro har, erasoa jasan duenari “bakarrik ez dagoela” adierazi diete herritarrek. Besteak beste, Erasotzailea kanpora! eta Gora borroka feminista moduko leloak entzun ahal izan dira.
Erasoaren harira, Mutrikuko Udalak adierazpen instituzionala plazaratu du. Gaitzespenik “irmoena” adierazi du gertatutakoaren inguruan, eta “babes eta elkartasun osoa” adierazi die erasoa jasan duen emakumeari eta haren ingurukoei. “Argi eta garbi adierazi nahi dugu ez dugula emakumeen aurkako indarkeriarik onartzen. Emakumeak kontrolpean eta mendean izan nahi dituztenen jarrera eta ideia matxista oro arbuiatzen ditugu”.
Tokiko erakundearen iritziz, asteburuan gertatutako erasoa ez da kasu isolatu bat, “sistema baten ondorioa” baizik; indarkeria matxista “arazo benetan larria” dela azpimarratu du. “Indarkeria matxista estrukturala da: oinarrian emakumeen eta gizonen arteko berdintasun eza eta diskriminazioa daude, eta sistema heteropatriarkalak sostegatzen du indarkeria hori. Horren aurrean, gizarte feminista eta justu bat aldarrikatzen dugu. Herritar guztiei indarkeria matxistaren aurrean zero tolerantzia izan dezatela eskatzen diegu. Indarkeria matxistarekin amaitzea jendarte osoaren ardura eta erantzukizuna da”.
Gertaera. HITZAk jakin ahal izan duenez, asteburuan gertatu zen erasoa; erasotua izan den emakumearen bikotekidea da erasotzailea. “Erasotzaileak, berriz ere, beste emakume bat (oraingoan bere bikotekidea) jipoitu, sexu erasoak egin eta labanaz mehatxatu du. Emakumearen ausardiari esker ihes egitea lortu du. Bere bizitza arriskuan egon da, eta fisikoki oso kaltetua utzi du”. Salaketa ipini ostean, atxilotu egin zuten erasotzailea, eta epaiketa azkar bat egin ostean, aske geratu dela esan dute. “Babes neurriak jarri dizkiote emakumeari eta 300 metroko urruntze agindua erasotzaileari”.
