Oihana Kortazarrek ez du Europako Txapelketan parte hartuko
Istripu baten ondorioz, min hartuta dago Mutrikun bizi den korrikalaria. Lesionatuta ez badago ere, Europako Txapelketa batera joateko moduan ez dagoela dio.
Mutrikuko bizilagunak auto istripua eduki zuen azaroaren 1ean. Istripuaren ondorioz, min hartu zuen, eta arrazoi horregatik egunotan (azaroak 19-20) Portugalen lehiatuko den Europako Skyrunning Txapelketan ez parte hartzea erabaki du. “Ez nago lesionatuta. Hankak egoera onean dauzkat, baina kolpearen ondorioz, hainbat traumatismo ditut. Europako Txapelketa batera joateko moduan ez nago %100ean. Azken hamabost egunetan ez naiz batere entrenatu, eta zerbikaletako eta toraxeko mina gutxiagotzen hasi bazait ere, eskuetan sekulako mina daukat oraindik. Traumatologoarekin gaur [azaroak 18] daukat txanda, eskuan zer daukadan ondo begiratzeko”.
Azpimarratu duenez, bi aldiz pentsatu gabe hartu du erabakia. “Istripua eduki eta handik bizpahiru egunera ez nindoala erabaki nuen. Erabakia hartzea ez zitzaidan batere kostatu, argi nuen zein zen nire lehentasuna. Txapelketara joateako momentua ez zela iruditu zitzaidan, gainera. Istripuaren ondorioz, semea ere ospitaleratuta egon da, eta horregatik nahiago izan dut etxean gelditzea. Genituen plan guztiak goitik behera aldatu dizkit. Orain ez dut txapelketa batetara joateko gogorik, eta fisikoki ere ez nago nire onenean. Beste batean izan beharko du”.
Laster lehiara itzultzeko moduan egotea espero du. Mendiko lasterketak prestatzen aurrerago hasiko da, “urte berriarekin batera”. Baina hurrengo asteetan dauden asfaltoko lasterketa batzuetan parte hartzeko asmoa duela aurreratu du. “Abenduaren 19an Gasteizen lehiatuko den Euskadiko Maratoi Erdiko Txapelketan izena emanda nago, esaterako. Hamabost egun geldik korrika egin gabe egon naiz, eta egunotan berrekin diet lehen entrenamendu motzei”.
