Unai Irazabal ondarrutarrak Longboard Zirkuitu Nazionaleko proba bat irabazi du
Galizian lortutakoa garaipenari esker, eta proba baten faltan, junior kategoriako sailkapen nagusian laugarren postutik bigarren postura jauzi egin du ondarrutarrak. Zirkuituko azken proba Kataluniako uretan lehiatuko du azaroan edo abenduan.
Longboard munduan iaz hasi zen lehiatzen Unai Irazabal Zubikarai ondarrutarra. Hirugarren postua erdietsi zuen Espainiako Txapelketan, eta orduz geroztik Longboard Zirkuitu Nazionaleko probak lehiatzen dabil. Erakustaldi ederra emanda, asteburuan Galizian Malpica de Bergantiños hondartzako uretan lehiatu den zirkuituko laugarren proba irabazi du. Junior mailan gizonezkoen 18 urtez azpiko kategorian nagusitu da. Tomas Bugallok, Manu Fernandezek eta Xabier Pradok osatu dute podiuma.
16 ditu ondarrutarrak, baina proban zaharragoen aurka ere aritu zen. “Bi mailatan izena eman nuen: open mailan eta junior mailan, 18 urtez azpikoetan. Maila absolutuan final-laurdenetan kanporatu ninduten eta nire kategorian irabazi egin nuen”.
Unai Irazabal podiumaren gorenean (eskumatik bigarrena). Argazkia: Quique Seijo.
Zirkuituko laugarren proban, oro har, olatu “eskasak” egon zirela esan du. Finalerako, baina, itsasoaren baldintzak aldatu, eta olatu “egokiagoak” eduki zituztela dio. “Kanporaketa fasean olatu oso txarrak eduki genituen. Handiak eta azkar apurtzen ziren; ohol gainean erakustaldi eder bat emateko handiegiak ziren”. Finalean, berriz, sentsazio onak eduki zituen, eta orain arte ikasitakoa erakusteko aukera eduki zuen. “Zortea eduki nuen. Inor ez zebilen nire ondoan, eta olatu polit bat hartzeko aukera eduki nuen. Olatu horregaz lortutako puntuazioari esker, finala erabakita geratu zen”.
Galizian lortutakoa zirkuituan lortu duen lehen garaipena izan da. Garaipen horri esker, eta proba baten faltan, junior kategoriako sailkapen nagusian laugarren postutik bigarren postura jauzi egin du ondarrutarrak. Open mailako sailkapen orokorrean, berriz, hamalaugarren postuan dago. Azken txanpari ekiteko gogotsu dagoela aitortu du eta hurrengo proban sailkapen burua “estutzen” saiatuko dela iragarri du. “Zirkuituko azken proban emaitza ona lortzen badut irabazteko aukerekin ikusten dut neure burua”. Zirkuituko hiru proba irabazi ostean, gaur gaurkoz, Nicolas Garcia asturiarra dago sailkapenaren buruan.Â
Unai Irazabal finalean olatu bat hartzen. Argazkia: Amaia Zubikarai.
Zirkuituko azken proba Kataluniako uretan lehiatuko dute. Roda de Bera herrian jokatuko dute proba (Tarragona, Herrialde Katalanak) azaroan edo abenduan. “Hurrengo proba noiz jokatuko duten ez dute zehaztu oraindik. Laster izango dela esan digute, olatuen eta itsas baldintzen arabera”.
