Geoparkean egingo dute mundu mailako 100 Global Geosite-en aurkezpena
Ekitaldia 2022an egingo dute, Zumaia eta Donostia artean. Ondare Geologikoaren Nazioarteko Batzordearen lehen bileran hartu dute ekitaldia Euskal Kostaldeko Geoparkean egiteko erabakia.
Ondare Geologikoaren Batzordeko kideen bilera, Geoparkean. Argazkia: Geoparkea. Ondare Geologikoaren Nazioarteko Batzordea aurreneko aldiz elkartu da Euskal Kostaldeko Geoparkean. AEB, Txina, India, Alemania, Frantzia, Maroko eta Espaniako ordezkariek parte hartu dute Asier Hilario Geoparkeko zuzendari zientifikoak eta IUGSeko Nazioarteko Ondare Geologikoarean batzordeko presidenteak eta Stanley Finney International Union of Geological Sciences-eko (IUGS) idazkari nagusiak antolatu duten bileran. Munduko interesgune geologikoen inbentarioa abian jarriko duen proiektuaren oinarriak finkatu dituzte eta erabaki dute, besteak beste, mundu mailako lehen 100 Global Geosites-en aurkezpena Euskal Kostaldeko Geoparkean egingo dela.
2022an egingo dute ekitaldia eta bertan IUGS-ko ordezkariak egongo dira. “Zumaia eta Donostia artean egingo den biltzar garrantzitsu honek munduko lehen 100 IUGS Global Geosites-en berri emango du eta IUGSen 60. urteurrena eta UNESCOren Nazioarteko Geozientzia Programaren 50. urteurrena ospatzeko ekitaldia izango da. Zentzu horretan, Geoparkeko flyscha zientzia programa garrantzitsu honen irudi eta erreferentzia bihurtuko da”.
Asier Hilario pozik agertu da, eta ondare geologikoa natur ondarearen zati garrantzitsu bat dela azpimarratu du. “Urteetan, Biotopoa eta Geoparkearen bitartez, erakutsi dugu ondare geologiko hau babesteko konpromisoa daukagula eta geoturismoaren eta txikienen hezkuntzaren bitartez bertako garapena bultzatzeko konpromiso hori erakutsi dugu”. Gaineratu du Ondare Geologikoaren nazioarteko batzordea zuzentzea “ohore bat” dela Gipuzkoarentzako, “nazioartean geroz eta garapen handiagoa duen arlo honetan erreferente bezala kokatzen gaituelako”.
Jabier Larrañaga Ekonomia Sustapeneko, Turismoko eta Landa Ingurumeneko foru diputatuaren iritziz ere “berri oso pozgarria” da 2022an IUGS Global Geosite programa Euskal Kostaldeko Geoparkean aurkeztea. “Natur ondarearen kudeaketan lurralde eredugarria izan nahi dugu mundu mailan, ondorengo belaunaldiek ere ezagutu eta gozatu ahal izan ditzaten hemen ditugun altxorrak. Eta Geoparkea euskarri oso garrantzitsua da konpromiso hori nazioartean proiektatzeko”.
