Ondarroa BHIko ikasleen lan bat saritu dute Homeless Film Festival-en
Bilbon ospatutako jaialdian ikastetxeetako ikasleek egindako lanak saritu dituzte. Ikastetxeen kategoriako sari bat lortu dute Ondarroa BHIko Gizarteratzeko Zikloko ikasleek.
Aurreko astean, azaroaren 17an eta 18an, 6. Homeless Film Festival-eko zinema eta antzerki jardunaldiak egin zituzten Bilbon. Jaialdian egin zituzten ekintzen artean, besteak beste, ikastetxeei zuzenduriko film laburren tailer bat egin zuten Bizitegi elkartegaz elkarlanean. Bazterkeria egoeran bizi diren etxerik gabekoei buruzko ikus-entzunezkoak sortu eta garatu behar izan zituzten ikasleek, eta horietan ikastetxe bakoitzeko onenak saritu zituen. Epaimahaiaren iritziz, Las voces de la calle izeneko lana izan zen Ondarroa BHIko lanik onena.
Ondarroa BHIko ikasleak Homeless Film Festival-eko ikastetxe kategoriako saria jasotzen. Argazkia: Homeless Film Festival.
Jenni Beitia, Idurre Aranberria, Eneritz Herreros eta Nora Agirre Gizarteratzeko Goi mailako Ziklo berriko 1. mailako ikasleek “pozik” jaso zuten ikastetxeko lanik onenaren garaikurra. Bakoitzari Elkar dendetan erabiltzeko 100 euroko bonua ere eman diete sari modura.
Homeless Film Festivalen parte hartu duten Ondarroa BHIko ikasleak. Argazkia: Ondarroa BHI.
Ondarroako BHIko zuzendaritza taldeko kideek esan dutenez, Gizarteratze Zikloko ikasle guztiek parte hartu dute jaialdian. Bost film labur aurkeztu zituzten lehiaketara eta horietako bategaz saria lortuta pozik daudela nabarmendu dute. “Maribel Arrien Gizarteratzeko Zikloko zikloko irakasleak jaialdia ezagutzen zuen, eta ikasleak bertara lanak aurkeztera animatu zituen. Erronka berri baten barruan egindako lan bat izan da honakoa, eta pozik gaude lortutako emaitzagaz”.
