30 urteren ostean agertokietara itzuliko dela iragarri du Delirium Tremens talde mutrikuarrak
1985etik 1991ra bitartean egon zen abian taldea. Erdi bana partekatutako lan bat, bi lan luze eta zuzenean grabatutako beste bat argitaratu zituen. Martitzenean [azaroak 30] emango duten prentsaurrekoan iragarriko dituzte itzulerari buruzko xehetasun guztiak.
Mauka diskoetxeak eta Last Tour management enpresak jakinari dutenez, duela 30 urte desegindako Delirium Tremens talde mutrikuarra agertokietara itzuliko da 2022an. Martitzenean [azaroak 30] Bilboko Kafe Antzokian prentsaurreko bat emango du rock taldeak; hain zuzen ere, duela 30 urte eman zuzen azken zuzenekoaren egun berbera baliatu dute horretarako. Agerraldi horretan emango dituzte itzulera horri buruzko argibide guztiak; orduan jakingo da noiz eta non joko duten.
Prentsara bidalitako oharrean horrela diote: “1991ko azaroaren 30ean eman zuen bere azken kontzertua Delirium Tremensek. Eta 30 urte hauetan gauzak asko aldatu dira, onerako bezala txarrerako. Bat, guretzat zoritxarrez, inoiz ez da berreskuratu ahal izango, baina 80ko bukaeran eta 90eko hasieran denon bihotzak ukitu eta astindu zituen kresal usaineko rock zuzen eta indartsu honek bizirik jarraitzen du. Oraindik ere! Bai horixe!”.
Taldea 1985etik 1991ra bitartean egon zen abian. 1985ean sortu zuten Andoni Basterretxeak (ahotsa eta gitarra), Juan Jose Iurrita Txufu-k (bateria) eta Javier Bilbatua Billy-k (baxua), eta, pare bat maketa grabatu ostean, 1987an argitaratu zuen Zarrapo talde nafarrarekin erdi bana partekatutako lehenengo diskoa: Hemen denak berdinak dira (Oihuka); garai hartan ohikoa zen bi talderen artean disko bat osatzea.
Hurrengo lau urtetan bi lan luze plazaratu zituzten. 1989an argitaratu zuten Ikusi eta ikasi (Oihuka) taldearen lanik entzutetsuena. Diskoa grabatzera sartu baino lehen Txufuk taldea utzi zuen, eta Patxi Irisarri sartu zen haren ordez. Diskoa grabatu eta berehala Iñigo Muguruza sartu zen taldean, eta Delirium Tremens laukote bilakatu zen. Urtebete beranduago argitaratu zuten estudioko azken diskoa, Hiru aeroplano (Oihuka). Bilbo zuzenean 91-5-24 (Esan Ozenki) zuzenean grabatutako diskoa izan zen taldeak kaleratu zuen azkena. Handik gutxira amaitutzat eman zuten ibilbidea.
