Ondarroako Arrigorriko VII. Bodyboard Txapelketa lehiatzen hasiko dira domekan
Aurten, estreinako, bi jardunalditan banatuta lehiatuko dute txapelketa. Antolatzaileek jakitera eman dutenez, 22 bodyboarderrek izena eman dute txapelketan.
Beste behin ere Arrigorriko Bodyboard Txapelketa lehiatuko dute Ondarroan. Txapelketa herrikoia domekan [azaroak 28] lehiatuko dute hondartzan. 09:00etan uretarako dira lehen parte hartzaileak, eta 14:00ak arte lehen jardunaldiko lehen bi errondak lehiatzen ariko dira.
Antolatzaileek esan dutenez, domekan bodyboardean aritzeko nahikoa baldintza egokiak egongo dira, eta horregatik erabaki dute txapelketa egun horretan egitea. “Egia esan, eguraldi eskasa dago iragarrita, euria eta iparraldeko haizea egongo dira, baina olatu ederrak egotea espero dugu. Irail, urria eta azaroa guztian ez da bodyboardean ariko besteko itsaso onik egon, eta lehenengo itsasaldia datorrela iragarri dutenean txapelketa antolatzea erabaki dugu.
22 bodyboarderrek parte hartuko dute txapelketan. “Urrian txapelketan izena emateko tarte bat zabaldu genuen, eta pentsa baino jende gutxiagok izena eman du. Denetara 22 lagunek parte hartuko dugu txapelketan. Hortik hiru gazte-gazteak dira; aurten estreinako parte hartuko dute txapelketan”.
Txapelketa egiteko epea 2022ko apirilera arte ezarri dute
Txapelketa aurten bestelako formatuan lehiatuko da, bi jardunalditan banatuta. “Lehenengo jardunaldian lehen bi errondak jokatuko ditugu, hamar txandatan banatuta. Bigarren jardunaldian, berriz, hirugarren erronda, final-laurdenak, finalerdiak eta finala jokatuko ditugu. Berezitasun modura, azken fasean lau laguneko txandak jokatu ordez, bikoak jokatuko ditugu. Hau da, azken fasean buruz burukoak jokatzea pentsatu dugu, zerbait berezia egitearren”.
Hurrengo jardunaldiaren data ez dute zehaztu oraindik. Txapelketa egiteko epea 2022ko apirilera arte ezarri dute, eta eguna olatu mailaren eta eguraldiaren arabera erabaki dutela esan dute. “2022ko apirilera arte horretarako astia edukiko dugula uste dugu”.
Antolatzaileek zale guztiak hondartzara hurreratzera gonbidatu dituzte. Gaineratu dutenez, giro onik eta ikuskizunik ez da faltako Arrigorri hondartzako inguruetan. “Aurreko urteetan egin modura, oraingoan ere txapelketa musikagaz girotuta egongo da. Hondartzako taberna zabalik egongo da; jan-edana egongo da. Nahiz eta eguraldi eskasa egon ea jendea bertora hurreratzera animatzen den”.
