Osasun larrialdia bihar sartuko da indarrean
Urkulluk jakinarazi du gaur bertan sinatuko duela osasun larrialdia deklaratzeko dekretua, eta bihar [abenduak 3] arratsalderako bilerara deitu du Labi.
Asteon Eusko Jaurlaritzako Osasun sailburu Gotzone Sagarduik iragarri du COVID-19aren datuen eboluzio «txarra» zela-eta berriz deklaratuko zuela Iñigo Urkullu lehendakariak osasun larrialdia; gaur arratsaldean, Lehendakaritzak jakinarazi du gaur [abenduak 2] bertan izenpetuko duela osasun larrialdia lehendakariak, eta ondorioz bihar bertan [abenduak 3] sartuko dela indarrean.
LABIren bilera, bihar [abenduak 3]. Bihar arratsalderako [abenduak 3], Urkulluk bilerara deitu du Labi, izurria kontrolpean hartzen ahalegintzeko neurriak ezartzen dituen batzordea. 16:30ean izango da. Ondoren emango dute ezarriko dituzten jarraibideen berri. Gaur goizean, Urkulluk esan du «neurrizkoak» izango direla. Pandemien aurkako legea onetsi zuten Eusko Legebiltzarrean, eta han ezarritako irizpideen araberako neurriak izango direla gogoratu du.
Urkulluk osasun larrialdia ezartzen duen hirugarren aldia izango da hau. 2020ko martxoan ezarri zuen lehenengo, hilak 14 zituela, COVID-19aren lehen olatuaren hasieran. Handik hilabete batzuetara, maiatzaren 18an, bertan behera utzi zuen; «zaintza eta kontrolerako» fase batera igaro nahi izan zuen. Baina abuztuan ezarri egin behar izan zuen berriro, datuek okerrera egin zutela eta. Osasun larrialdi hura indarrean egon zen orain bi hilabete arte; urriaren 5ean, datuak apalduta zeudela ikusita, bertan behera utzi zuen berriro. Baina ez du luze iraun.
Neurriak espero dira osasun ziurtagiriari dagokionez ere. 50 bezero baino gehiagoko jatetxeetan eta gaueko aisialdian eskatzen hasteko baimena lortua du Jaurlaritzak Espainiako Auzitegi Gorenaren partetik, eta auzitegiaren ebazpen ofiziala eskura izan orduko indarrean jarriko dutela esaten ari dira Jaurlaritzako iturriak. Are gehiago, gaur Iñigo Urkulluk iragarri du aztertzen ari direla ziurtagiri hori beste alor batzuetara ere zabaltzen hastea. Onartu du, hala ere, ez dela egun batetik besterako kontua izango: auzitegien babesa beharko lukete berriz. Nafarroako Gobernuan ere ziurtagiriaren erabilera hedatzeko asmotan dabiltza; Maria Txibite lehendakariak gaur iragarri du zahar etxeetan eskatzen hastea aztertzen ari direla.
