Txakartegik, Bustinduik eta Aurrekoetxeak Titan Series Almeria proba lehiatuko dute
Abenduaren 8tik 12ra bitartean egingo da proba, Andaluzian (Espainia). Abentura bizitzeaz gain, Aspanovasen aldeko aldarria egingo dutela azpimarratu dute.
Marokon Titan Desert (2015) eta Saudi Arabian Titan Series (2020) probak egin ostean, Ander Txakartegi abenturazale eta Helmugak proiektuaren sustatzaile berriatuarrak Titan Series Almeria proba egingo du datorren astean. Eta beraz batera joango dira Oier Aurrekoetxea bermeotarra eta Iñigo Bustindu ondarrutarra; Aurrekoetxeak Saudi Arabiako proba ere lehiatu zuen, eta Bustinduik Titan Desert proba.
Txakartegik azaldu duenez, abentura bizitzea izango da euren helburua. Eta, zelan ez, orain arte egin modura, Aspanovasen aldeko aldarrikapena ere egingo dute. Bide horretatik, gogorarazi du Aspanovasen aldeko Internet bidezko diru bilketak zabalik egoten jarraitzen duela; printzipioz abenduaren 31ra arte egongo da diru ekarpena egiteko aukera. Izan ere, Helmugakeko kideak aurten egingo duen azken kirol proba izango da Titan Series Almeria.
Probari dagokionez, azaldu du lau etapatan banatuta dagoela proba, eta guztira 250 parte hartzaile inguru ariko direla. “Guztira 400 kilometroko proba da, eta Europako basamorturik handiena zeharkatzen du”. Nahiz eta desnibel aldetik zailtasun handirik ez dagoen, Txakartegik aurreratu du area askoko guneak zeharkatu beharko dituztela. “Titan Series probek beti edukitzen dute tranparen bat edo beste. Eta kasu honetan hondarra izango da arazoa. Hondar gainean bizikletagaz ibiltzea oso zaila izaten da”.
- Abenduak 8 (prologoa): 24 kilometro (Almeria).
- Abenduak 9 (1. etapa): 101 kilometro eta 1.486 metroko desnibela (El Toyo-El Toyo).
- Abenduak 10 (2. etapa): 66 kilometro eta 1.768 metroko desnibela (El Toyo-Tabernas).
- Abenduak 11 (3. etapa): 94 kilometro eta 1.399 metroko desnibela (Tabernas-Tabernas).
- Abenduak 12 (4. etapa): 64 kilometro eta 740 metroko desnibela (Tabernas-El Toyo).
