Mutrikuko Udala auzotarrekin batuko da
Eguenean [abenduak 9] hasita, eta guneka banatuta, aurrez aurreko hiru batzar egingo dituzte Zabiel kultur etxean. Herritarrek bost modutara helarazi ahalko dituzte euren auzoari buruzko kexa, iradokizun edo iritziak.
Urtero modura, auzo guztietako beharrak, kexak eta iradokizunak herritarren ahotik jasotzeko ariketa abiarazi du Mutrikuko Udalak. Azpimarratu dutenez, auzoz auzoko batzarrak ariketa “oso garrantzitsua” dira udalarentzat. “Herritarrek esateko dutena entzutea benetan beharrezko diren aldaketak eta hobekuntzak egiteko giltza dira”.
Eguenean [abenduak 9] hasita, eta guneka banatuta, hiru batzar egingo dituzte. “Arau aldaketarik ez baldin bada iristen behintzat”, herritarrekin informazioa partekatzeko batzar guztiak Zabiel kultur etxean eta aurrez aurre egiteko asmoa dutela azpimarratu dute. Guneka egun batzuk zehaztu dituzte eta kultur etxera hurreratu ezin dutenek horiek Youtubeko Mutrikuko Udala kanalean ere jarraitu ahal izango dituzte zuzenean. “Batzarrera etorri ezin bazarete, Internet bidez zuzenean edo ondorengo egunetan jarraitu ahal izango dituzue bileraren nondik norakoak”. Batzarrak honako egun eta orduetan egingo dira:
- 1. gunea. Abenduak 9, eguena, 18:00etan. Goiko Plaza, Erdiko Kale, Konde Kalea, Atxitxin Kale, Atxitxin Aldapa, Beheko Plaza, Barrenkale, Ipar Kale, San Gil, Frontoiko Aldapa, Sabanika, Azkiaga, Felix Txurruka, Tranpa Kale, Nasa Kalea, Piñastegi, Burumendi eta Ibirriaga.
- 2. gunea. Abenduak 10, barikua, 18:00etan.Domingo Ibaibarriaga, Jose Antonio Ezeiza, Agirre Lehendakaria, Madalena, San Miguel, Gaztañeta Almirantea, Jose Maria Altzibar, Entzus, Txurruka Tenienteak, Iriagirre, San Agustin, Hirigibel, Samikolla, Isabel Lobiano eta Olatz Bidea.
- 3. gunea. Abenduak 11, zapatua, 11:00etan. Landa Eremuak, Pikupe eta Urazamendik.
Batzarrak aurrez aurre egingo badira ere, gaineratu dute herritarrek bost modutara helarazi ahalko dituztela euren auzoari buruzko kexa, iradokizun edo iritziak:
- Auzo horretako batzarrean zuzenean hitza hartuta.
- Batzarra Youtuben zuzenean emititzen ari diren bitartean iruzkin bat idatzita.
- Internet bidez, labur.eus/auzoz helbidean sartu eta bertan idatzita.
- Posta elektronikoz, komunikazioa@mutriku.net helbidera mezu bat idatzita.
- Etxerik etxe bidaliko duten eskuorriaren atzeko aldea bete eta udaletxean, turismo bulegoan, liburutegian edo merkatu plazan ipinitako buzoietako batean botata.
