Abenduaren 30a da Mutrikuko pala txapelketan izena emateko azken eguna
Danok Bat Pelotazale Elkarteak antolatuta eta Mutrikuko Udalak lagunduta, Mutrikuko Pala Txapelketa jokatuko dute beste urte batez Miruiatz frontoian. Txapelketa, ohi modura, bikoteka jokatuko dute. Parte hartzeko interesa dutenek barikutik [abenduak 10] hilaren 30era izena eman beharko dute. Frontoian bertan izena eman ahalko da eta nahi dutenek 943-60 41 91 edo 634 42 65 88 telefono zenbakietara deituta edo Whatsapp mezu bat bidalita ere izena eman dezaketela esan dute. Zalantzak argitu edo txapelketari buruzko informazio gehiago nahi dutenentzat beste harremanetarako telefono zenbaki bat ere eman dute: 617 72 34 56.
Antolatzaileek aurten ere gonbidapen zabala egin diete herriko, eskualdeko eta inguruetako herrietako palistei eta zaleei. Izena ematerako orduan 45 euro ordaindu beharko dira bikoteko, eta gogorarazi dutenez, 16 urtetik gorakoentzako dago zabalik. Funtzionamenduari dagokionez, aurten ere hiru mailatan banatuta jokatuko dute txapeketa. Hori bai, maila bakoitzeko oreka bermatzeko asmoarekin, bikoteen mailaren araberako aldaketak egin ditzazkete antolatzaileek.
Antolatzaileek aurreratu dute txapelketa urtarrilaren 14an hasiko dela. Urtero modura, ligaxka bat jokatuko dute lehendabizi, eta ondoren azken fasea jokatutako dute sailkapen taulako aurrenekoek. Sariei dagokienez, txapelak, garaikurrak, kirol materiala eta bestelako sariak egongo dira jokoan, besteak beste.
