Bizkaiko finalak jokatuko dira Markina-Xemeingo Uni frontoian
Gazte eta nagusien kategoriako finalak jokatuko dira barikuan [abenduak 10]. Markina-Xemein, Berriatua, Lekeitio eta Gernika-Lumoko klubetako puntistak daude finaletan.
Bizkaiko Kluben Arteko Zesta-punta Txapelketa amaierara iristen ari da. Barikuan [abenduak 10] jakingo da nortzuk diren gizonezkoen gazte eta nagusien 1. eta 2. mailetako aurtengo txapeldunak. Markina-Xemeingo Uni frontoian jokatuko dira finalak 17:30etan hasita.
Markina-Xemeingo, Berriatuko, Lekeitioko eta Gernika-Lumoko klubetako puntistak ailegatu dira kategoria horietako finaletara. Gazteak izango dira kantxaratzen lehenak. Gazteetan, Markina-Xemeingo Arakis eta Atain II. eta Berriatuko Xabi eta Ortzi aurkituko dira aurrez aurre. Ondoren, nagusien 2. mailako norgehiagoka jokatuko da. Nagusien 2. mailako finalean Ibarluzea I. eta Elkoro I. Markina-Xemeingo bikotea eta Lekeitioko Akarregi Pilota Taldeko Galletebeitia anaiak neurtuko dira. Eta, azkenik, nagusien 1. mailako irabazleak erabakiko dira. Final horretan Berriatuko Antzon Alberdi eta Lekue eta Gernika-Lumoko Roke eta Diaz aurkituko dira aurrez aurre.
Finalaurrekoak. Datorren asteburuan jokatuko dira, bestalde, mutilen kadete mailako finalak eta nesken kadete-gazte mailakoak. Asteburu honetan jakingo da nortzuk egongo diren final horietan. Izan ere, finalaurrekoak jokatuko dituzte neskek Markina-Xemeingo Uni pilotalekuan barikuan [abenduak 10] 16:45ean, eta mutilek domekan [abenduak 12] 12:00etan.
Markina A (Erika-Arai) eta Berriatua B (Elaia-Elena) neurtuko dira Markina-Xemeinen, Berriatuan, berriz, Berriatua (Danel-Xuban) eta Markina B (Txanton-Garate) bikoteen arteko norgehiagoka egongo da. Finaletarako sailkatuta daude dagoeneko Berriatua A (Ihart-Maialen) kadete-gazte nesketan eta Markina A (Jokin-Peru) kadete mutiletan.
