Doako film emanaldiak eta herriko zinemagileen film laburren proiekzioak, Ondarroan
Herriko zinemagileen lanak urtarrilaren 9an proiektatuko dituzte, eta ondoren zuzendariekin solasaldia egingo dute. Saio guztietarako gonbidapenak turismo bulegoan hartu behar dira, proiekzioaren egunean bertan 12:00etatik 14:00etara edo emanaldia hasi baino ordu erdi lehenago.
Proiekzioak Ondarroako Udalak antolatu ditu, Zeta zine klubaren laguntzagaz. Filmen proiekzioak ondoko egunetan izango dira, Kofradia Zaharreko 2. solairuan: zapatuan [abenduak 11] Little Monsters proiektatuko dute 18:30ean (+12 urte), domekan [abenduak 12] The gentlemen 18:30ean (+12 urte), abenduaren 26an Fantasia dokumentala 18:00etan (+12 urte) eta urtarrilaren 2an Polar express 18:00etan (4-12 urte bitartekoentzat).
Esan dute urtarrilaren 2ko umeentzako proiekzioan hiru begirale egongo direla eta ondorioz ezingo dela gurasorik sartu: “Umeak gurasorik edo arduradunik gabe ikusiko dute film hau. Proiekzioa hasita umeren batek aretotik joan nahiko balu, begiraleek gurasoei edo arduradunei deituko liekete haurreraren bila joateko”.
Urtarrilaren 9an, baina, herriko zinemagileak izango dira protagonista. Izan ere, egun horretan herriko zinemagileen film laburrak proiektatuko dituzte, 18:00etan, eta proiekzioak egin eta gero zuzendariekin solasaldia egingo dute; ekintza 12 urtetik gorakoei zuzenduta dago. Ondokoak dira proiektatuko dituzten ikus-entzunezkoak eta zuzendariak:
- OlentEro: Aiert Goenaga (10 minutu).
- IQHARA: Leire Ikaran eta Beñat Bidegain (3 minutu).
- Roma & Julia: Iosu Artetxe (9 minutu).
- Konfinamendua: Josu Eizagirre (5 minutu).
Gonbidapenak. Zehaztu dute saio guztietarako gonbidapenak proiekzioen egunean hartu beharko direla, 12:00etatik 14:00etara turismo bulegoan edo proiekzioa hasi baino ordu erdi lehenago. “Gonbidapenak hartzerakoan datuen fitxa bete beharko da”.
