Lehen mailako arreta kontsultak atzeratuko ditu Osakidetzak
Besteak beste, bihotzeko arazoak dituztenen eta bronkitis kronikoa duten pertsonen kontrolak atzeratuko dituzte. «Jarraipen kontsultak garrantzitsuak dira, eta egingo ditugu, baina aurrerago».
Iazko azaroan osasun sistema indartzeko eskatzeko herritarrek osasun etxeen aurrean egindako protesta. Birusaren hedapenari dagokionez, «momenturik txarrenetariko bat» da egungoa Araban, Bizkaian eta Gipuzkoan, eta egoera «arduratzeko modukoa» dela esan du Gotzone Sagardui Eusko Jaurlaritzako Osasun sailburuak. Dioenez, azken asteetan erregistratzen ari diren positibo kopuruak isla dauka ospitaleetan, baina baita ere lehen arretan. Horri lotuta, iragarpen bat egin zuen: «Aparteko larritasunik ez duten» lehen arretako kontsultak atzeratuko dituzte.
Besteak beste, bihotzeko arazoak dituztenen eta bronkitis kronikoa duten pertsonen kontrolak atzeratuko dituzte. «Jarraipen kontsultak garrantzitsuak dira, eta egingo ditugu, baina aurrerago». «Beharrezkoak diren analitikak» egingo dituztela ziurtatu du Sagarduik, baina aitortu du «atzerapen pixka bat» egon daitekeela horietan ere. Halaber, onartu du kirurgia «gutxiago» programatu behar izan dituztela. Erabakiak erakusten du lehen mailako arreta oso justu ari dela Osakidetzan. Aurrerantzean, lehentasuna edukiko dute «akutuak» diren osasun arazoek; hala nola arnas infekzioek, sukarrak, Sintromaren kontrolak eta koronabirusak. Ez du zehaztu zenbat denbora atzeratuko dituzten kontsulta orduak.
Kontsultaren baten zain dauden pertsonei esan diete itxaroteko Osakidetzaren abisua; Osakidetzak deitzen dien pertsonen kontsultak soilik utziko dituzte bertan behera, gainerakoek joan egin beharko dute: «Gerta liteke hurrengo egunetan kontsulta batzuk bertan behera geratzea. Horrela bada, osasun zentroa jarriko da pazienteekin harremanetan». Sagarduik eskatu du ez hasteko osasun zentroetara deika.
