Markina-Xemeinen eta Berriatua inguruko errepideetan sortu dira arazo handienak. Markina-Xemeinen suhiltzaileek kendu dute ura.
Ur putzua sortu den Markina-Xemeingo sarrera, ura kendu ostean. Markina-Xemeingo sarreran (suhiltzaileen etxearen parean) putzu handi bat sortu da, eta horrek errepideko bide bat hartu du. Hasiera batean ibilgailuak pasatu egin badira ere, gerora bidea moztu egin dute. Suhiltzaileek jakinarazi dute eurek kendu dutela ura, eta estoldak ere zabaldu egin dituztela.
Artibai erreka ere urez gainezka dago, eta, horren harira, Markina-Xemeingo Udalak ohartarazi du errekak gainez egin dezakeela: “Ez ibili oinez erreka ondoan, eta ibilgailurik ere ez aparkatu. Ahal dala kotxerik ere ez hartu. Eta urak eroateko moduko gauza guztiak erretiratu, batez be kutsadura eragin ahal duten produktu arriskutsuak”.
Bestetik, Berriatuan, Kide parean, errepidetik erreka pasatzen zela zirudien. Eta Aulesti eta Munitibar arteko errepidea ere itxi egin dute.
Mutrikun eta Amoroton ere lur jausiak gertatu dira; Ipitxarriko bihurgune parean eta Venecia dantzalekuaren beheko aldean ere harriak jausi dira.
Kostaldean, gainera, olatu handiak egon dira; arratsalderako 4-5 metrora arteko olatuak espero dituzte.
Euriteengatik ezarritako alerta laranjak barikuko [abenduak 10] 15:00ak arte iraungo duela esan dute, eta errepidean kontuz ibiltzeko gomendatu du Segurtasun Sailak; arazoak sortu diren lekuetan seinaleak jarri dituzte.
Ura Berriatuan, Kide parean.
Kide
Artibai erreka, Markina-Xemeinen.
Mutrikun, Villa Osa parean jausitako harriak kentzen.
OHARRA: irakurleren batek Lea-Artibai eta Mutrikun euriteak eragindako argazki gehiago edukiko balitu, ondoko posta elektronikora bidali ahal ditu: lea.hitza@gmail.com
