Lexuri Gallastegi mutrikuarra Euskal Herriko kartzela batera lekualdatuko dute
Gallategirekin batera Zigor Blanco, Gorka Lupiañez, Jose Maria Novoa eta Ion Troitiño ere Euskal Herriratuko dituzte. Eusko Jaurlaritzak zehaztu beharko du orain zein kartzelatara lekualdatuko dituzten.
Espainiako Espetxe Erakundeek gaur jakinarazi dutenez [abenduak 9], beste bost euskal preso Euskal Herriratuko dituzte. Lekualdatuko dituzten preso horien artean dago Lexuri Gallastegi Sodupe mutrikuarra. Gaur egun Zuerako (Zaragoza, Espainia) kartzelan dago, etxetik 250 bat kilometrora. Hilabete gutxian bigarrenez lekualdatuko dute. Udaberrian Almeriako espetxetik Zuerara lekualdatzea erabaki zuten Espainiako Espetxe Erakundeek, baita bigarren gradura igarotzea ere.
Gallastegirekin batera Zigor Blanco, Gorka Lupiañez, Jose Maria Novoa eta Ion Troitiño ere Euskal Herriratuko dituzte, baina Espainiako Espetxe Erakundeek ez dute zehaztu zein kartzelatara ekarriko dituzten. Espainiako Barne Ministerioak esan du “dagokien espetxea” Eusko Jaurlaritzak zehaztu beharko duela; urriaren 1etik Jaurlaritzak du Martutene, Basauri eta Zaballako espetxeen eskumena.
Preso mutrikuarra 2010eko martxoaren 4an espetxeratu zuten eta 2031ko ekainean beteko ditu zigorraren hiru laurdenak.
