Ondarroan zozkatu egingo dituzte Pirritx, Porrotx eta Marimototsen saiorako sarrerak
Udal iturriek azpimarratu dute Ondarroan bizi diren umeek parte hartu ahal izango dutela zozketan. Zozketan izena emateko azken eguna hilaren 16a da.
Pirritx, Porrotx eta Marimototsek Kuikui ikuskizuna eskainiko dute abenduaren 30ean, 18:00etan, Ondarroako Zaldupe kiroldegian, udalak antolatuta. Kiroldegiko aforoa “oso murriztua” izango denez, sarreren banaketa zozketa bidez egingo dutela esan dute. Azpimarratu dutenez, Ondarroan bizi diren umeek parte hartu ahal izango dute zozketan. “Datu hau udalak egiaztatu egingo du”.
Zozketan parte hartzeko bi modu daude:
- Ondarroako ikastetxeetan ikasten duten umeek ikastetxeetan bertan izena eman ahalko dute.
- Ondarroatik kanpo ikasten duten umeek, ostera, turismo bulegoan izena behar dute.
Izena emateko azken eguna hilaren 16a da; 14:00etan jarri dute epemuga. Udalak hilaren 20an jakinaraziko du sarrerak zeini egokitu zaizkion, eta nora jon beharko diren sarrerak jasotzera.
Sarrerak 5 eurotan ipiniko dituzte salgai. “Prezio bakarra ezarriko da kantxatik zein harmailetatik ikusteko”. Zehaztu dute herritar bakoitzak gehienez ere lau sarrera eskatu ahal izango dituela, eta umeentzako ikuskizunak izanik, lehentasuna haurrei emango dietela ere esan dute. “Ume bakoitzeko heldu bakarra joatea gomendatzen da. Sarrerak eskatzeko orduan ere, eta ahal den neurrian, proportzio hori mantendu beharko da; hau da, hiru ume eta nagusi bat”.
