Basque eta Laduche sailkatu dira banakakoaren final-laurdenetara
Banakako Jai Alai World Tour txapelketaren lehenengo bi final-laurdenak barikuan [abenduak 17] lehiatuko dituzte. Arbe egungo txapeldunak Basqueren kontra jokatuko du, eta Erkiagaren eta Olharanen artekoa izango da gaueko beste final-laurdena.
Berriatuan jokatzen ari diren Banakako Jai Alai World Tour txapelketaren final-laurdenak barikuan [abenduak 10] erabaki ziren. Kanporaketa fasean nagusituta, Basquek eta Laduchek egin dute aurrera.
Bi final-laurden aste honetan lehiatuko dituzte, eta beste biak, berriz, abenduaren 23an. Bariku honetan [abenduak 17] Arbe markina-xemeindarrak–egungo txapelduna– Basqueren kontra jokatuko du, eta Erkiaga ispastertarrak eta Olharanen kontra. 21:00etan hasiko da jaialdia, eta sarrerak 5 eurotan ezarri dituzte.
Abenduaren 23an [eguena] Aimar berriatuarrak Ladutxen kontra jokatuko du. Lopezen eta Barandikaren artekoa izango da gaueko beste final-laurdena.
Finalerdiak abenduaren 30ean lehiatuko dituzte, eta finala urtarrilaren 7an.
Argazkia: Berriatuko Zesta Eskola.
Basqueren eta Goixerri mutrikuarraren artekoa izan zen barikuko lehen partidua, eta berdinketa hausteko setean erabaki zen. Lehenengo seta nagusitasunez osoz irabazi zuen Goixerrik (12 eta 4). Bigarrenean 12 eta 9 gailendu zen Basque. Lehenengo jokoan ez bezala, bigarren horretan partiduan sartzea lortu zuen lapurtarrak, eta markagailua iraulita lortu zuen seta; 2 eta 5 atzetik zegoela, sei tanto jarraian egin zituen. Hirugarrenean nahikoa parekatuta aritu ziren. Azken tantoa lehiatua eta emozioz beterikoa izan zen, azkenean, iparraldeko pilotariak lortu zuen final-laurdenetarako txartela (5-4). “Biak nahikoa pilota motelagaz ibili ziren partidu osoan. Bigarren setean lehenengo pilota apurtu egin zitzaien, eta Basquek berria ateratzean pixka bat bizitu zen. Goixerrik errebotean ezin izan zion minik egin. Hirugarrenean nahikoa berdinduta ibili ziren”, azaldu du Mikel Plaza Berriatuko Zesta Eskolako kideak.
Cosmek eta Laduchek erakustaldia eman zuten Mendibarren frontoian, eta bien jokoaz gozatu ederra hartu zuten Mendibarren frontoian bildutako zaleek. Laduche bi setak irabazita sailkatu zen final-laurdenetara (6 eta 12 amaitu zuten lehen jokoa, eta 9 eta 12 bigarrena). Partidu ona bezain gogorra izan zen. Tanto luzeak izan ziren nagusi. Getariakoak akatsik barik lortu zuen garaipena, aparteko maila erakutsi zuen. “Laduchek gaitasun itzelak buruz buru jokatzeko; pilota motelagaz gehiago atzeratu egiten zuen, eta errebotera errezago heltzen zen, eta hortik tantoa dominatzen hasten zen. Serio jokatu, eta partidua kontrolpean eduki zuen. Tantoek adierazten dutena baino partidu gogorragoa izan zen”, azaldu du Plazak.
Argazkia: Berriatuko Zesta Eskola.
