Lea Ibarran energia komunitatea sortzeko lehenengo pausoak ematen hasi dira
Aurkezpen hitzaldiak ematen ari dira herriz herri. Azaroan Amoroton eta Gizaburuagan egin bezala, aste honetan Aulestin, Munitibarren eta Mendexan batuko dira herritarrekin.
Lea Ibarrako Mankomunazgoa eta berau osatzen duten Amorotoko, Aulestiko, Gizaburuagako, Mendexako eta Munitibarko udalak energia komunitatea edo Energia Berriztagarrien Komunitateak (EBK) sortzeko pausoak ematen hasi dira. Goiener Kooperatiba izango dute bidelagun.
Amoroton eta Gizaburuagan azaroaren azkenengo asteburuan egin zituzten aurkezpen-batzarrak, eta orain, Aulestiko, Munitibarreko eta Mendexako aurkezpen-hitzaldien deialdiak zabaldu dituzte. Eguenean (abenduak 16) 19:00etan Aulestiko Udal Aretoan elkartuko dira herritarrekin. Barikuan (abenduak 17) Munitibarren aurkeztuko dute ekimena, 19:30ean Udal Aretoan, eta zapatuan (abenduak 18) mendexarren txanda izango da; 17:00etan bilduko dira Udal Aretoan.
Energia komunitatea zer den, zelan sortzen den eta ze abantaila edo onura eskaintzen dituen azalduko dute aurkezpen horietan, eta bertaratutakoen zalantzak argituko dituzte.
Denen artean sortutako, denentzat. Bazkideez osatutako kooperatibak dira energia komunitateak. Zehatz esateko, Energia Berriztagarrien Komunitateak (EBK) bazkide talde batez (pertsona fisikoak, elkarteak, ETE-ak, administrazio publikoak…) osatutako pertsona juridikoak dira. “Borondatez eta parte-hartze kooperatiboaren bidez, komunitatearentzako edo beste batzuentzako onura energetiko, sozial, ingurumenekoak eta ekonomikoak lortzeko, haien helburuak finkatzen dituzte. EBK kontzeptua Europako 2 zuzentarautan oinarrituta dago, nahiz eta Espainiako Estatuak oraindik ez dituen Espaniako legedian txertatu. Zuzentarauen irizpideak kontutan harturik, egun ezagutzen diren pertsona juridikoen artean kooperatibek bermatzen dituzte baldintza horiek”.
Komunitateotan baliabide naturalak erabiliz ekoitzitako energia %100 berriztagarria (eguzki-energia, hidraulikoa, eolikoa eta biomasaren erabilera) sustatzen dute, era jasangarri batean: “Planeta zaintzen dugu, hau da, gure ingurunea, gure bizitza esparrua eta gure familiaren osasuna zaintzen ditugu”.
Lea Ibarreko proiektuaren sustatzaileen berbetan, kostuak murrizteko aukera eskaintzen du energia komunitateak, “bidezkoa den prezioa izango duen elektrizitate fakturan aurreztuz”.
Pertsona bakoitzak boto bat izatearen printzipioak arautzen duen eredu kooperatibo batean oinarritzen dira komunitate horiek, eta besteren artean, norbanakoak, administrazio publikoak enpresa txiki eta ertainak (ETE) izan daitezke bazkide.
Argazkia: Amorotoko Udala.
