Migratzaileen Nazioarteko Eguna gogoratuko dute Markina-Xemeinen
Elkarretaratzea egingo da eguerdian Goiko Portalean. Arratsaldean, berriz, munduko pintxoak eta musika egongo dira. Horrez gain, informazio mahaia egongo da egun osoan frontoi txikian.
Arrazakeriaren kontrako elkarretaratzea Markina-Xemeinen. Argazkia: Ongi Etorri Errefuxatuak Zapatuan [abenduak 18] Migratzaileen Nazioarteko Eguna dela eta, manifestu bat kaleratu du Pertsona migratu, arrazializatu eta errefuxiatuen biltzarrak “lege arrazisten, borondate politikorik ezaren eta, batez ere, pertsona migratuen bizitzan eta lurraldeetan kolonialismoa betikotzearen ondorioz pairatzen dituzten zapalkuntza eta bidegabekeria guztiak” salatu asmoz. Manifestu horregaz bat eginez, eta Migratzaileen Nazioarteko Egunaren harira hainbat ekimen egingo dira Markina-Xemeinen ere, herriko pertsona migratzaileek antolatuta.
Alde batetik, elkarretaratzea egingo da 13:00etan Goiko Portalean. Baina, horrez gain, argazki erakusketa eta informazioa eman, materiala saldu edo dohaintza bat egiteko mahaia egongo da egun osoan frontoi txikian. Arratsaldean, gainera, munduko pintxoak eta musika ere egongo dira.
Manifestuan salatzen dute besteak beste, Europar Batasunak eta Frontexek eramandako bere mugako erregimenaren ondorioz itsasoan milaka etorkin hil izana, atzerritarren legeak baimendutako arrazakeria instituzionala, pertsona migratuen eta arrazializatuen aurkako poliziaren indarkeria, migratzaileek dituzten lan-baldintza eskasak, harrera-programa solidarioak sortzeko borondate politikorik eza, migranteentzako kartzelak diren CIESak, etorkinek atzerritarren bulegoetan izapideak egiteko hitzordurik ez izatea eta inoren kargura ez dauden adingabeen kriminalizazioa. Eta horiei erantzun bat ematea exijitzen dute; bide seguruak eta legezkoak pertsona guztientzat, atzerritarren legea berehala indargabetzea eta sarekada arrazistekin amaitzea beste batzuen artean.
