Jai Transmaribollu egingo dute Ondarroan
Zapatuan [urtarrailak 15] Gaztetxean egingo duten jaiaren helburua da Lea-Artibai eta Mutriku mailan saretzea sustatzea eta bultzatzea. Diotenez indarrean dauden neurriak kontuan edukita egingo dute ospakizuna.
Zisheteropatriarkatuari sue!!! lelopean egingo duten jai ez mistoa Lea-Artibai eta Mutrikuko Transmaribolluk taldeak antolatuta dago. Taldea udazkenean hasi zen bidea egiten eta honakoa da antolatu duten lehenengo ekintza. Jaia ospatzeko gogotsu daudela esan dute antolatzaileek, eta helburua Lea-Artibai eta Mutriku mailan saretzea sustatzea eta bultzatzea dela gaineratu dute. “Gure lehenengo elkartze eta saretze momentua izango da zapatuko jaia. Jai eta ospakizun formatuan gure aldarria zabaltzeko beste modu bat dela iruditzen zaigu”.
Jaia egungo baldintzetara moldatuta egingo dutela esan dute. “Hasiera batean ekintzak beranduago amaitzen ziren beste egitarau bat genuen prestatuta. Besteak beste, dantza tailer bat eta beste kontzertu bat egitea genuen aurreikusita, baina ekintzak 01:00etarako amaitu behar direla ikusita, egoerara moldatutako zerbait antolatu dugu”. Kolektiboarekin identifikatuta sentitzen den edonori egin diote gonbidapena. “Kolektiboko jendearentzako espazio bat sortzeko asmoarekin sortutako jai bat da”.
Bazkarian parte hartzeko aurretik izenik eman beharrik ez dagoela esan dute.
12:00etan Gaztetxe aurrean batzera deitu dute. 12:30ean, ostera, talde argazkia ateratzeko asmoa dute. Ostean, jolas poteoa egingo dute tabernarik taberna. “Askotariko jolasak egingo ditugu elkar ezagutzeko. Jolas batzuek une bat iraungo dute, baina beste batzuk luzeagoak izango dira”. Jolas poteoa amaitu ostean, bazkaritan batuko dira Gaztetxean. Bazkarian parte hartzeko aurretik izenik eman beharrik ez dagoela esan dute; bakoitzak etxetik eramandago janariarekin egingo dute jatordua, “era autogestionatuan”.
Bakalostean asanbladan batuko dira. “Asanblada parte hartzeko gune irekia izango da. Hainbat proposamen ditugu, eta gaiak irten ahala horiek lantzen joango gara. Besteak beste, egunean bertan sortuko diren beharrizanei erantzuten saiatuko gara eta, aldi berean, bertaratzen den jendeari talde baten beharrizana ikusten duten ala ez ere galdetuko diogu. Bide batez, jendeari gure taldera batzeko gonbidapena egiteko baliatuko dugu asanblada”.
Musikarekin amaituko da jaia. 18:00etan No name:Tiriti! musika taldea igoko da oholtzara eta ostean DJ jaialdiarekin jarraituko dute. Bakailuak saltsan DJ mutrikurrekin batera Pronombre neutro eta Kika1000 DJen doinuek dantzan jarriko dituzte bertaratzen diren guztiak.
EGITARAUA
- 12:00. Gaztetxean elkartzeko deia.
- 12:30. Argazkia eta jolas poteoa.
- 14:30. Bazkaria eta asanblada.
- 18:00. Jaia Gaztetxean: No name: tiriti!, Bakailuak saltsan, Pronombre neutro eta Kika1000.
