Ondarroako kiroldegiak ere Mugiment egitasmoagaz bat egin du
Zaldupe udal kiroldegiko erabiltzaileek Mugiment txartelaren ekimenera atxikita dauden Araba, Bizkai eta Gipuzkoako edozein kiroldegitan doan sartzeko aukera edukiko dute.
Ondarroako Zaldupe kiroldegiko erabiltzaileek Eusko Jaurlaritzak sustatutako Mugiment Kirol Txartela eskatu dezakete. Gaur gaurkoz, Araban, Bizkaian eta Gipuzkoan 62 kiroldegi daude atxikita programara, eta horien artean daude Lekeitio, Markina-Xemein, Mutriku, Eibar, Bermeo, Gernika-Lumo, Mundaka, Bilbo, Barakaldo eta Larrabetzu (ikusi zerrenda osoa behean).
Ondarroako Udalak ia urtebeteko lana egin du proiektu berri horretara atxikitzeko. Nagore Badiola Alberdi kirol zinegotziak herritik kanpo ikasten edo lanean dauden herritarrentzat “programa aproposa” dela dio: “Gure herriko kiroldegian ez dagoen zerbitzuren bat erabili nahi duenarentzat ere programa aproposa da. Agintaldi hasieratik geneukan helburua da, kirolzaletasuna eta bizitza osasuntsuak bultzatzeko estrategikoak baitira horrelako ekimenak”.
Mugikorrean aplikazioa instalatu, datuak sartu eta bazkidetza eginda duen kiroldegiak baimendu ostean beste kiroldegietara sartu ahalko da
Jakinarazi dute kiroldegi bakoitzak erabakitzen duela gainontzeko erabiltzaileei zein zerbitzu eskaini; hau da, Zaldupe udal kiroldegiak erabakiko du beste herrietatik Ondarroara doazenei zein zerbitzu eta zein ordutan eskaini. “Horrela, zerbitzu gehiago ipintzen dira herritarren esku, beti ere abonatuei kalterik eragin barik”.
Mugikorrean. Mugiment Kirol Txartela mugikorrean eduki daiteke, aplikazioa jaitsita (IOS sistema eragilea / Android sistema eragilea). Norbanako bakoitzak datuak sartu eta bazkidetza eginda duen kiroldegiak baimendu ostean, ekimenean izena emanda dauden kiroldegietara sartzeko aukera edukiko du. Kirol instalazioetara sartzeko txartela eta nortasun agiria erakutsi beharko dituzte erabiltzaileek.
Egitasmora atxikitutako udalerriak: Santurtzi, Portugalete, Ortuella, Trapagaran, Zierbena, Abanto-Zierbena, Sestao, Barakaldo, Muskiz, Arrasate, Bergara, Eskoriatza, Oñati, Amurrio, Laudio, Ugao-Miraballes, Bakio, Arrigorriaga, Basauri, Etxebarri, Bermeo, Erandio, Gernika, Lemoa, Sopela, Durango, Berriz, Elorrio, Sondika, Zamudio, Lekeitio, Mungia, Markina-Xemein, Mundaka, Ermua, Eibar, Soraluze, Elgoibar, Mutriku, Mendaro, Deba, Zumaia, Zestoa, Getaria, Zornotza, Bilbo, Azpeitia, Orio, Urduliz, Zumarraga, Derio, Legazpi, Abadiño, Larrabetzu, Getxo, Gorliz, Galdakao, Beasain, Ondarroa, Ordizia, Lezo eta Orozko.
