Sute bat sortu da Ondarroako Kaleandiko etxebizitza batean
Hiru etxebizitzako etxe batean sortu da sutea, oraindik ez dakizkiten arrazoiengatik. Hiru bizilagun eroan dituzte Galdakao-Usansoloko ospitalera, kea arnasteagatik. 18:00ak aurretik itzali dute sua.
Sutea izan da Ondarroako Kaleandiko etxebizitza batean. Kaleandiko etxebizitza batean sutea izan da gaur [urtarrilak 15, zapatua]. 15:40an jaso dute abisua Larrialdi Zerbitzuek, eta 18:00ak aurretik itzali dute sua suhiltzaileek. Segurtasun Sailak HITZAri jakinarazi dioenez, hiru etxebizitzako etxe batean gertatu da sutea, lehen solairuan, hain zuzen ere. Armairu baten atzean hasi da, oraindik ezagutzen ez diren arrazoiengatik.
Ke handia sortu da eta, horregatik, sua piztu den eraikineko eta alboko eraikinetako bizilagunak kanporatu egin dituzte. Gutxienez 24 orduz egon beharko dute haien etxebizitzetatik kanpo, horiek aireztatu bitartean. Hiru bizilagun eroan dituzte Galdakao-Usansoloko ospitalera, ke asko arnastu duelako. Bestelakoan, kalte materialak nahikoa handiak izan dira, batez ere sua piztu den etxebizitzan; bestetik, beheko lokaletara ur asko joan da.
Zunbeltz Bedialauneta Ibaibarriaga alkatea, Larrialdi Zerbitzuetakoekin. Argazkia: Intza Martinez
Erribera kalean utzi dituzte suhiltzaileen kamioiak. Argazkia: Intza Martinez
