Euskal Kostaldeko Museoen Hilabetea, eskaintza kulturala balioan jartzeko eta zabaltzeko
Euskal Kostaldeko Museoen Sarea osatzen duten 40 museo eta zentroetan ia 200 ekintza egingo dituzte martxoan. Horien artean, Lekeitioko Itsas Argian eta Nautilus, Mutrikuko Ikasgune Geologikoan askotariko jarduerak eskainiko dituzte.
Argazkia: Lekeitioko Udala. Pandemiarengatik etenaldi “behartua” egin ostean, aurtengo martxoa ere Euskal Kostaldeko Museoen Hilabetea izango da. Euskal Kostaldeko Museoen sarea osatzen duten arduradunen berbetan, “edizio berri hau, are bereziagoa” izango da.
Segurtasun berme guztiekin antolatuta, eta jendeari horiek betetzeko eskaera luzatuta, jarduerak eta edukiak “anitzak” izango dira, askotarikoak baitira sareko 40 museo eta zentroetan lantzen dituzten gaiak: “Baina badute zerbait amankomunean proposamen gehienek; bereziak eta bakarrak izango dira, urtean zehar gozatu ezin diren planak”.
Sareko zentroek “orotako jendearentzat ia 200 ekintza, abantaila eta deskontu aukera” eskainiko dituzte: familientzako tailerrak, haurrentzako jolasak, bisitaldi gidatuak eta abar. Horietako batzuk doakoak izango dira, baina denetarako ere aurretiaz erreserba egin beharko da. Horrez gainera, ate irekien jardunaldietan zentroak doan bisitatzeko aukera edukiko dute bisitariek.
Euskal Kostaldeko Museoen Sarea museoak, interpretazio zentroak eta bestelako ondare baliabideak batzen dituen elkarlanerako topagunea izateko eratu zuten, eta Euskal Kostaldeko Museoen Hilabetea sortu zuten kostaldeko eskaintza turistikoa osatzeko eta bertako eskaintza kulturala balioan jartzeko eta zabatzeko. Horretarako, museo-produktu bateratuak garatzeko, proiektuak partekatzeko eta komunikazio eta sustapen ekimenak bultzatzeko apustuari eusten diote.
Egitarau oparoa. Besteak beste, Lekeitioko Itsas Argian eta Nautilus, Mutrikuko Ikasgune Geologikoan askotariko jarduerak eskainiko dituzte hurrengo hilabetean.
Lekeitioko Santa Katalina Itsasargian bisita gidatuak eskainiko dituzte martxoko asteburu denetan, “2 euroko prezio bereziagaz”.
Nautilus, Mutrikuko Ikasgune Geologikoaren ate irekien egunetan sarrera doakoa izango da, eta horrez gain, familiei zuzendutako fosil tailerra egingo dute bi igandetan jarraian, Nautileseko gela didaktikoan, eta hori ere doakoa izango da.
- LEKEITIO: Santa Katalina Itsasargia
Martxoak 5, 6, 12, 13, 19, 20, 26 eta 27. Bisita gidatua, 11:30 eta 13:00. - MUTRIKU: Nautilus
Martxoak 20 eta 27. Fosil tailerra familientzat, doan, 11:00etatik 13:00etara.
Martxoak 26 eta 27. Ate irekiak. Larunbata, 10:00-14:00 eta 17:00-19:00. Igandea, 11:00-14:00.
