Beteranoen txapelketako faboritoek finalean egoteko aukerak sendotzen jarraitzen dute
Gandiaga anaiak eta Malax-Madariaga bikoteek irabazi dituzte txapelketako azken aurrekoetako lehen partidak. Datorren domekan [martxoak 6] jokatuko dira bueltako partidak.
Gandiaga anaiak eta Rober-Egaña bikoteen arteko partida. Eñaut Gandiaga sakea ateratzeko prest. Argazkia: AkarregiPilota Taldea Faboritoak ez dute hutsik egin, eta erraz irabazi dituzte Lekeitioko trinketean jokatzen ari diren Beteranoen Eskupilota Txapelketako azken aurreko lehen partidak. Gandiaga anaiak 30-13 irabazi zieten Roberri eta Egañari eta Malaxek eta Madariagak 30-8 Jaunarena eta Praderari.
Iban eta Eñaut Gandiaga, Izarra epailea eta Egaña eta Rober. Argazkia: Akarregi Pilota Taldea
Lehen partida berdinduta hasi zuten Eñaut eta Iban Gandiaga anaiek eta Roberrek eta Egañak. Eñaut Gandiagak falta egin zuen hasierako sakean eta 0-1 jarri ziren aurretik Rober eta Egaña. Baina ez zuten abantaila hori aprobetxatu eta naiz eta pilota sarera zuzenean bidali, ez zuen marra gainditu eta 1-1 berdinduta jarri ziren bikoteak.
2-2 berdindu zuten hurrengo, baina hortik aurrera 19-8ko abantaila hartu zuten Gandiaga anaiek, batez ere anai gaztearen, Iban Gandiagaren, jokoari esker. Maisutasunez abiadura eman, teilatua aprobetxatu eta frontisetik pilota urrun jarriz min handia egin zion Mendaroko Egañari. Rober saiatu zen aurrean Eñaut nahasten, baina defentsa bikaina egin zuen, eta tanto gutxi galdu. Sakeetan ere min handia egin zuen, 6 tanto lortuz.
Bestalde, Rober bergararrak, eguazteneko [otsailak 23] entrenamenduan zuntz haustura txiki bat eduki zuen, eta Gandiaga anaiek 25-11 tantoa egiterakoan mina nabaritu zuen eta errenka jarraitu zuen partida. Egañak ere lurrean amaitu zuen Ibanek 28. tantoa egiteko pilota errebotera bidali zuenean, baina ondo errekuperatu zen.
Pradera, Jaunarena, Izarra epailea, Malax eta Madariaga. Argazkia: Akarregi Pilota Taldea
Bigarren norgehiagoka. Domekako [otsailak 27] bigarren partidan ere galtzen hasi ziren irabazleak, baina segituan hartu zuten agintea Malaxek eta Madariagak eta 13-5 jarri dira markagailuan. Malaxek 10 sake tanto egin zituen, eta naiz eta eskuko minagaz egon, errez ibili zen jokoa antolatzen. Jaunarena nafarra alegindu zen bere jokoa egiten, baina Malaxek pilota gehienak bueltatzen zituen eta abiadura emanez tantoa bereganatzen zuen. Atzean, berriz, sendo aritu zen Madariaga eta Pradera zaparrada ezin eutsita. Horrela, Malaxen dejada eta Madariagak sarera bidalitako tanto ederrak ikusi ahal izan ziren atzo.
Markagailua 24-7 zegoenean, uzkurdura sentitu zuen izterrean Praderak eta lekuz aldatu behar izan zuen. Partida amaitzen ahalegindu zen, baina 25-8 zihoazela bertan behera utzi behar izan zuen partida, ondorio larriagorik ez izateko. “Espero dugu bueltako partidarako, hau da datorren domekarako, prest izatea”, adierazi dute txapelketaren antolatzaileek.
Bueltako partidak datorren domekan [martxoak 6] jokatuko dira. Hiru partida jokatuko dira, lagunarteko bat eta lehiaketako bi:
- 09:30ean, lagunartekoa: Asti-Beraza/Martin-Foster
- 10:30, azken aurrekoa: Gandiaga anaiak/Rober-Egaña
- 11:30, azken aurrekoa: Malax-Madariaga/Jaunarena-Pradera
