Ipar Euskal Herrian azterketak euskaraz egin ahal izatea aldarrikatu dute
Arratsaldean elkarretaratzeak egin dituzte Ondarroako Zubi Zahar herri ikastolaren eta Lekeitioko Azkue ikastolaren aurrean.
Ipar Euskal Herriko ikasleek azterketak euskaraz egiteko duten eskubidearen alde, Euskal Herriko Ikastolen Elkarteak, Seaskako ordezkariekin eta Azterketak Euskaraz kolektiboagaz batera, elkarretaratzeak deitu zituzten gaurko [martxoak 4]. Euskal Herri osoko ehundik gora ikastolatan egin dituzte elkarretaratzeak, eta eskualdeko ikastoletako ikasle zein irakasleak ere batu dira “elkartasun eta babes” aldarrira.
Ikastolen Elkarteak egindako deialdiari erantzunez, arratsaldean Ondarroako Zubi Zahar herri ikastolako eta Lekeitioko Azkue ikastolako hainbat ikasle eta irakasle batu dira ikastola kanpoetan. Egindako aldarrikapenen muina, hain zuzen, Baxoa (Derrigorrezko Bigarren Hezkuntzaren amaieran egin beharreko azterketa) eta Brebeta (Batxilergo amaieran egin beharreko azterketa, selektibitatearen parekoa) euskaraz egin ahal izatea izan dira.
Lekeitioko Azkue ikastolaren kanpoan egindako elkarretaratzea. Argazkia: HITZA
Egoera kezkagarria dela iritzita, hizkuntza eskubideen alde “gogor” borrokatzeko prest daudela azpimarratu dute Ikastolen elkarteko ordezkariek. Frantziako erakundeen jarreragaz “haserre” agertu dira, eta adierazi dutenez, ikasleen eskubide urraketak eta desobedientzia zibileko ekintzak egin dituzten irakasleen zigorrak ez dira Seaskako “komunitatearen aurkako erasoa” bakarrik; hau da, Frantziako Hezkuntza agintarien erabakiek “euskarari, euskal kulturari, euskaraz bizi nahi duen herri bati egiten zaion erasoa” dela uste dute, “ikastola mugimendu guztiaren aurkako erasoa”, alegia.
Erakundeei, alderdi politikoei zein eragile sozialei ere egin diete aipamena, ikastola guztiak “eraso honi aurre egiteko bat eginda” daudela adieraziz eta beraien erantzukizuna aldarrikatuz.
Ondarroako Zubi Zahar herri ikastolaren kanpoan egindako elkarretaratzea. Argazkia: HITZA.
