Arai Lejardi, Unax Vidal eta Gorka Mugartegi izendatu dira Bizkaiko txapeldun
Zesta-puntako banakako txapelketa irabazi zuten Berriatuko Mendibarren frontoian barikuan eta zapatuan [martxoak 4 eta 5] jokatutako finaletan.
Letra handiz idatzita geratuko dira Bizkaiko banakako lehen txapeldunen izenak. Bizkaiko Eusko Pilota Federakuntza izan da txapelketa berriaren antolatzailea eta “oso balantze positiboa” egin du: “Ez, gu bakarrik, parte hartzaileak ere oso pozik daude”.
Barikuan 19:15ean hasi zen jaialdia emakumezkoen gazteen mailako finalagaz. Arai Lejardi eta Maialen Aldazabal egon ziren nor baino nor, eta espero bezala, partida oso orekatua eta borrokatua eskaini zuten. Hasiera batez ere oso berdindua izan zen markagailuan, 11-11 joan ziren ia lanerdietan. Pixkanaka puntista markina-xemeindarrak errebesaz pilotakadak luzatzen hasi zen, errebotera arte helduz. Azkenean Lejardi 25-16 nagusitu zen.
Gizonezkoen lehen mailako finalean etxeko bi puntista egon ziren aurrez aurre: Unax Vidal eta Julen Iriondo berrituarrak. Azken honen zesta haustura, 3-6 aurretik zioanean, partidako gako nagusia izan zen. Zesta aldaketagaz deseroso aritu zen Iriondo, eta Vidalek ezin hobeto baliatu zuen 14-0ko partzial erabakigarri bat ezartzeko. Behin partida hautsita, lasaiago aritu zen 25-12ko azken emaitzara arte.
Zapatu goizean jokatu zen gizonezkoen bigarren mailako finala. Emakumezkoetan bezala, Markina-Xemeinera joan zen txapela. Hiru finaletatik berdinduena izan zen. Gorka Mugartegi Atain II.a frontoian erakutsitako nagusitasuna, sakearen bidez min handia egin zuen eta kolpean ere gehiago izan zen, ezin izan zuen markagailuan islatu. Egoitz Urrejola durangarrak partida borobila osatu zuen, defentsan lanetan batez ere. Azkenean ez zen nahikoa izan eta puntista markina-xemeindarrak 25-21 irabazi zuen.
