Lea-Artibai eta Mutrikuko puntistek hiru txapel lortu dituzte Euskal Ligan
Markina-Xemeingo, Mutrikuko eta Berriatuko puntistek Euskal Herriko kluben arteko txapelketako lau finaletan parte hartu dute.
Nagusi mailako finala Hondarribian jokatu zuten barikuan [martxoak 4]. Mutrikuko Danok Bateko Bixente Gonzalezek eta Mikel Manzisidorrek Hondarribiako bikotearen aurka “sekulako partida” jokatu zuten; 30-14 nagusitu ziren. Jon Mendizabal Danok Bateko ordezkariaren esanetan, partida “oso serioa” izan zen: “Gonzalez eta Manzisidor bikote lehiakorra dira, eta hondarribiarrek ere ondo jokatzen duten arren, ez genien aukera askorik laga”. Talde bezala pozik agertu dira, euskal federazioak antolatzen duen txapelketarik garrantzitsuenetarikoa da Euskal Liga, hortaz, esku zabalik hartu dute nagusitasunez lortutako garaipena.
Mikel Manzisidor eta Bixente Gonzalez, Euskal Ligako domina soinean. Argazkia: Danok Bat.
Domekan [martxoak 7], berriz, kadete, gazte eta 22 urtez azpikoen finalak jokatu zituzten Gasteizen. Kadete mailako txapela Markina-Xemeingo zesta-punta eskolako Jokin Maguregik eta Oinatz Garitagoitiak lortu zuten; 30-14 nagusitu ziren Noaingo bikotearen aurka.
Gazte mailako txapelik lortzeko aukerarik barik geratu ziren Berriatuko zesta-punta eskolako Xabi Arrasate eta Patxi Pagoagoa; 17-30 galdu zuten Zumaiako Gonzalo Agirre eta Julen Cabanillasen aurka. Zumaiako bikoteak aurretik hasi zuen lehia, eta abantaila horri eutsi zioten amaiera arte.
Bi txapel irabazi dituzte Markina-Xemeingo zesta-punta eskolako puntistek. Ezkerretik eskumara: Martin Ormaetxea, Gorka Mugartegi ‘Atain’, Jokin Maguregi eta Oinatz Garitagoitia. Argazkia: Markina-Xemeingo zesta-punta eskola.
22 urtez azpiko kategoriako txapela eskualdean geratu zen. Markina-Xemeingo Martin Ormaetxeak eta Gorka Mugartegi Atain-ek 30-19 irabazi zuten Berriatuko Ekaitz Bilbaoren eta Amets Aldazabalen aurka. Partida nahikoa parekatuta hasi zuten, baina partidak aurrera egin ahala, Markina-Xemeingo bikoteak euren jokoa egin, eta aldeko tanto gehiago egiteko aukera eduki zuen.
