Martxoak 8rako motorrak berotzen hasi dira hainbat herritan
Eskualdean asteburuan ekin diote emakumearen aldeko aldarrikapenekin.
Ondarroan, barikuan [martxoak 4], Etxelila txiki geratu zen Boga-Boga Emakumeen Elkarteak antolatutako Almudena Grandes eta Carmen Valcarceleren hitzaldirako. Hurrengo egunerako utzi zuten jai giroa Itaiak antolatutako bertso bazkariagaz eta Auzi taldearen kontzertu akustikoagaz. Arratsaldean luntxa eta dantzaldia izan zuten Antiguako Aman, eta gauean, kontzertuak, gaztetxean. Aulestin ere egun osoan egon ziren ekintzak domekan [martxoak 6]. Goizean umeek plaza apaindu zuten, eta gero, bertan elkarretaratzea egin. Zumba saio labur bat egiteko denbora izan zuten eta guzti bazkaldu aurretik. Bingo musikatuarekin eta jolasekin amaitu zuten eguna.
Lekeition ere mahai baten inguruan elkartu ziren emakumeak zapatuan [martxoak 5]. Mugimendu feministak antolatuta, lehenengo trikipoteoa egin zuten herriko kaleetan zehar, ondoren bertso doinuekin jesarri ziren mahaian. Markina-Xemeinen Nire sudur punta zirku ikuskizunaz gozatzeko aukera izan zuten, Uni frontoian aurrean. Etxebarrian asteburu osorako luzatu zuten egitaraua. Zapatuan poteo musikatu egin zuten, eta ostean emakumeen afaria Irubiden. Domeka goizean kultur aretoan Etxebarriko Emakume kooperatibistekin solasaldia egin zuten parekidetasun batzordeak antolatuta.
