Kinttopeko Sari Nagusia lehiatuko dute, estreinako, Etxebarrian
Gaur [martxoak 25] emango diote hasiera txapelketari, eta martitzenera [martxoak 26] arte luzatuko da. Herriko buztarri bakarreko harria erabiliko dute probetarako.
Asko dira Etxebarriko Pazkoetako idi probak egutegian gorriz zehaztuta dutenak. Aurten, gainera, lehendabizikoz Kinttopeko sari nagusia antolatu du Etxebarriko Udalak, Bizkaiko Foru Aldundiaren laguntzagaz.
Berritasuna beti erakargarri da, eta Etxebarrian ez da gutxiago izan. Kinttopeko lehen sari nagusiak guztira hamabi partaide izango ditu, eta, horrenbestez, lau egunetan banatu dute antolatzaileek txapelketa. Gaur [martxoak 25] emango zaio hasiera 21:00etatik aurrera. Nor baino nor gehiago ariko dira Lemonizko Andrakas jatetxea, Oiartzungo Eneko Artola eta Errezileko Bizkiz. Bihar [martxoak 26] ere ordu bera mantenduko dute: Zallako Zornotza anaiak, Igeldo ezkiotarra eta Oliden oriotarrak lehiatuko dute. Domekan [martxoak 27], ordea, 17:00etan ekingo diote Zurramagako Egoitz Armaolea, Arronako Etxetxo eta Ainhoa Gabirondo oriotarrak. Azkenik, martitzenean [martxoak 29] berriro 21:00etako ordutegia itzuliko da, eta aurrez aurre ariko dira Billabaso elkarteko bilbotarra, Mendigoitxi eibartarra eta Bilelako Iñaki Lopategi.
Herriko buztarri bakarreko harria izango da idiek mugitu beharko dutena, eta 250 kiloko txapagaz erabiliko da. Sari handiak daude, irabazleak 1.300 euro eta Olaia jatetxearen manta irabaziko ditu. Lehenengo zortzi sailkatuek jasoko dituzte sariak, eta gainontzekoek 500 euro lortuko dituzte dietetan. Horretarako, baina, gutxienez 25 untze egin behar dituzte.
