Mutrikuk ekainean abiatuko du KAE Liga
Mutriku KAE ligako bigarren mailan arituko da. Aurtengo ARC Ligako egutegia ekainean jarriko dute abian, Donibane-Lohizunen [Lapurdi]: ekainaren 19an lehen mailakoek; 25ean, berriz, bigarrenekoek. Mutrikuk proba bat hartuko du, uztailaren 2an.
Aurten ere KAE Liga lehiatzeko parada izango dutMutrikuko traineruak. Beste denboraldi batez, maila bitan banatu dituzte lehian sartuta ibiliko diren taldeak, eta antolaketa horri jarraituz egingo dute txapelketa. Denboraldiaren amaieran, abuztuaren 27an nahiz 28an, playoffak lehiatuko dituzte. Uztailaren 2an Mutrikuk hartuko du KAE Ligako norgehiagoka. Estropada 16:30ean hasiko dute; arraunlariek hiru kale izango dituzte, eta lau luze egin beharko dituzte. Hurrengo egunean, uztailaren 3an, izango da Busturialdeko estropadaren txanda; Elantxobek hartuko du, 12:00etatik aurrera. Busturialdea, gainera, KAE1 mailan dago aurten, bigarren mailatik igota. Elantxoben arituko diren parte-hartzaileek lau kale izango dituzte, lau luze egiteko.
KAE1e mailakoen denboraldia ekainaren 19an hasiko da, San Pedron. Uztaila, KAE1 mailakoentzat, estropadaz betetako hilabetea izango da. Elantxobeko probaz gain, Zumaian, ekainaren 26an, lehiatuko denaz gain, ondorengoetan konpetituko dute kategoria horretako arraunlariek: Castron [uztailaren 2an], San Juan [9an], Pedreñan [16an], Orion [17an], Illunben [23an] eta Camargon [30ean]. Abuztuko probei dagokienez, Hondarribiko [7an], Arkoteko [13an], Castroko [15ean], Zarauzko [20an] eta Deustuko [21ean] estropadak izango dituzte.
KAE2 mailak beranduxeago hasiko du denboraldia, ekainaren 25ean, Donibane-Lohizuneko urertzean. Uztaila eta abuztua ere norgehiagokaz josita egongo da. Mutrikuko probaren ondoren, Donostian [uztailaren 3an] eta Portugaleten [9an] lehiatuko dute, eta, ostean, KAE1eko egutegia berbera izango dute KAE2koek uztailean. Abuztuan, ostera, zenbait proba gehiago izango dituzte bigarren mailakoek: 7an, Oreretan; 13an, Castron; 20an, Santoñan; eta 27an, Colindresen. Denboraldia, 27an eta 28an amaituko dute, playoffen lehiagaz.
