Alberto Lopez Brasaola lekeitiarraren koadroa aita santuaren eskuetan dago
Atzo [maiatzaren 25a] goizean eman zioten koadroa, Ibon Perez lekeitiarrak eta Brasaolaren senideek, Vatikanoko San Pedro plazan egindako entzunaldiaren amaieran.
Brasaolak margotutako aita santuaren erretratoa. Argazkia: Ibon Perez Ibon Perez kazetari lekeitiarrak bete du bere hitza. Atzo [maiatzak 25] goizean Vatikanoan egindako audientzian entregatu zioten Frantzisko aita santuari Alberto Lopez Brasaola margolariari lekeitiarrak egin zuen aita santuaren erretratua, hari agindutakoa betez. San Pedro plazan egin zen audientziaren amaieran eman zioten koadroa aita santuari berari Perezek eta Brasaolaren familiak, haren emazte Tere Goienetxeak, Izaskun Lopez Goienetxea alabak eta bere senar Joseba Salinas Eskurtzak.
Koadroa eman eta aita santua agurtu ahal izatea esperientzia berezia izan dela azaldu du kazetari lekeitiarrak. Emozioa izan zen nagusi, eta ezin izan zituzten malkoak saihestu. “Deskribatu ezin daitekeen esperientzia izan da”, azaldu du emozioz bete. “Alberto gurekin zegoela sentitu dugu, indarrak ematen”, esan du.
Alberto Lopez Brasaolak egindako aita santuaren erretratua. Argazkia: Ibon Perez
Koadroagaz gainera, Perezek malta eta Lekeitioko bizilagun batek egindako alfajorrak ere eraman zizkion, atzo Argentinan, Frantziskoren herrialdean, ospatzen zen Aberri Egunaren jaia gogoan.
Ez da izan erraza aita santuagaz audientzia lortzea, baina Brasaolaren koadroa jada aita santuaren eskuetan dago. “Eliza arkaiko samarra zela uste nuen, antzinakoa, eta jendearen eskaera guztiak ez zitzaizkiola iristen, baina ez. Fitxatuta eta ondo fitxatuta gintuzten. Monsinore Leonardo Sapienzarekin egon naiz hartu emanetan gutun bidez, eta gutun guztiak gordeta zeuzkan. Oso zirraragarria izan da “. Perezek jakin duenez, koadroa aita santuaren Santa Marta gelan jarriko dute.
Rome Reports Aita Santuaren eta Vatikanoaren jardueran espezializatutako Nazioarteko albiste-agentziak jaso zuen aita santuak Perezi eta Brasaolaren familiari egindako harrera IRUDIETAN.
