Asteburuan lehiatu zen Saturrarango kanpinean 640 kiloko lehenengo jardunaldia, eta hirugarren postua eskuratu zuen Mutriku Sokatira Taldeak.
Asteburuan eman zioten hasiera lur gaineko 2022ko Euskadiko Sokatira Txapelketako 640 kiloko lehenengo jardunaldiari. Saturrarango Arbelaitz kanpinean burutu zen, mutrikuarrek etxean lehiatzen zuten, eta horrek konfiantza eman zien.
17:00etan hasi zen jarduna, eta sei talde zeuden zelaian lehiatzeko prest; Gaztedi A, Gaztedi B, Gaztedi C, Goiherri, Akelarre eta Mutriku. Orain arte lehiatutako jardunaldietan nagusitasuna erakutsi duen Gaztedi A taldea izendatu zen garaile Mutrikun, 6 puntuak etxeratuz. Bigarren postuan, Goiherri taldeak eskuratu zituen 5 puntuak. Hirugarren postua etxekoek eskuratu zuten, hain zuzen ere, Mutriku Sokatira Taldeko partaideek, hortaz, 4 puntu geratu ziren etxean. Laugarren postuan, 3 puntugaz, Gaztedi B, bosgarrenean, Akelarre 2 puntugaz, eta Gaztedi C izan zen puntu batekin geratu zena.
Hain zuzen ere hiru jardunaldiz osatuta egongo da txapelketa, eta puntu gehien batzen dituen taldeak jantziko du txapela. Hurrengo jardunaldia, bigarrena, ekainaren 4an [zapatua] izango da, Laukizen. Hirugarren, eta azken, jardunaldia ekainaren 11an izango da Erandion.
