Urrezko bi domina etxeratu dituzte Solabarrietak eta Badiolak
Zutikako eta etzandako kategorietan parte hartu, eta bietan lortu dute lehenengo postua eskuratzea.
Asteburuan Santanderren lehiatu da 2022. urteko FEDC Kopako bigarren hitzordua. Bi egunez aritu dira lehian, Bizkaia, Gipuzkoa, Araba, Nafarroa eta Andaluziako hamar tiratzaile. Bi kategoria lehiatu dituzte, zutikakoa eta etzandakoa, eta bietan eskuratu dute lehenengo postua Ager Solabarrietak eta Maite Badiolak.
Zutikako kategoria izan zen lehenengoa lehiatzen. Ondarrutarren atzetik, Manuel Encinas eta Encarnacion Millan malagarrek eskuratu zuten bigarren postua. Juan Antonio Castillo eta Mª Antonia jaendarrek osatu zuten podiuma.
Lehenengo lehian garaipena lortuta, hurrengo egunean jokatu zuten etzandako kategoria. Kasu horretan nagusitasuna erakutsi zuen bikote ondarrutarrak. Bigarren postua Sonia Rivero eta Antonio Cobo andaluziarrek eskuratu zuten eta hirugarrena Miguel Rodrigez eta Virginia Arangurenek.
2022ko lehenengo FEDC Kopa otsailean lehiatu zen Errioxan, eta puntuazio esanguratsuak lortu zituzten Solabarrietak eta Badiolak. Hain zuzen ere, zutikako kategorian urrezko domina eskuratu zuten eta etzandakoan zilarrezkoa. Merituak lortuz ibilbide paregabea ari dira osatzen ondarrutarrak.
