Ibilgailu elektrikoa erosi du Mankomunitateak
Bi karga gune ezarri dituzte eskualdean, Mutrikuko Garbigunean eta Eibarko Plantan.
Debabarrenako Mankomunitateak trantsizio energetikorako bidea ireki du lehen ibilgailu elektrikoa erosiz, eta Iosu Arraiz Mankomunitateko lehendakariak adierazi duenez, “urteak daramatzagu lanean Debabarrena gero eta jasangarriagoa eta ingurumenarekiko begirunetsuagoa izan dadin. Bide horretan, gure lehentasunetako bat da zerbitzuetan trantsizio energetikoari bidea irekitzea, kutsadura murriztuko duten politika berdeak sustatzeko”.
Ibilgailu elektriko berria Citroen Jumpy-E bat da, eta ibilgailuak eta makinak konpontzeko tailerrean erabiliko da. Hori dela eta, tailer mugikor moduko bat du atzealdean, beharrezko erremintak eraman ahal izateko. Ibilgailu berria erosteko 47.772,25 euroko inbertsioa egin da.
2021ean neurtu zituzten Mankomunitatearen ibilgailuek isuritako gas kutsagarriak eta urtero berotegi-efektuko 1.000 tona gas isurtzen dituztela ikusi zuten. Datuak aztertu ondoren, gas kutsatzaile horiek murrizteko Ekintza Plan bat diseinatu zuten, eta lau ildo estrategiko eta hamabi ekintza zehaztu zituzten.
Mankomunitatearen ibilgailu flotaren ingurumen aztarna murrizteko ekimenen baitan, “lehen ibilgailu elektrikoa erostean aurrerapauso handia eman dugu, eta trantsizio energetikorako bidea egiten hasi gara” gaineratu du Arraizek.
Bi karga puntu eskualdean
Mankomunitateak trantsizio energetikoa sustatzeko lanean jarraitzen duenez eta daudenak ordezkatzeko ibilgailu elektriko gehiago erostea aurreikusten duenez, bi karga gune instalatu ditu eskualdean; Eibarko Plantan eta Mutrikuko Garbigunean.
