Grabitatearen aurka
Erronkari gutxi batzuk eusten dioten arren, probatu dutenek dakite soilik airean zintzilikaturik dantza egiteak ematen dizun askatasuna; airea, horma eta gorputza uztartuz, sortu.
Iturria: Beñat Bidegain Dantza bertikala, teknikoki ez da beste ezerekin alderagarria, nahaste bat baita. Dantza eta eskaladaren elementuak uztartzen ditu, eta horma hartzen du oinarri. Hortaz, dantza bertikalak plano aldaketa bat dakar berekin, eta grabitatea sartzen da jokoan. Plano aldaketak, gorputza grabitatearekin beherantz egitea dakar, eta hori da dantza horren zailtasuna eta erronka, grabitatearen aurka joatea.
Horman oinez egiteko beharrezkoa da euskarri bat izatea, gorputzaren erdialdetik datorren euskarria. Grabitateak sortzen duen beheranzko indarraren aurka joateko indarra egin ahal izateko, eta une horretan, arnesa bilakatzen da bidelagun. Arnesa ez da elementu organikoa, hau da, bere funtzio naturala ez da mugimenduari erresistentzia egitea, eta gorputzarekin bat egitea, sostengatzea baino, erorketa ekiditea. Hortaz, elementuak uztartzeko bidean, praktika eta entrenamendua dira gogortzeko modu bakarra, beharrezko forma fisikoa mantentzeko indartzen zaituelako.
Denborak eta praktikak ematen dizu gozatzeko ahalmena
Euskal Herri mailan ez dago jende asko dantza bertikala egiten duenik, eta are gutxiago bere ogibide duena. Baina hor dago erronka. Eta erronka horren erdigunean ditugu Naiara Arrizabalaga, Irune Uriarte, Maite Kaltzakorta, Maitane Sarralde eta Naia Negredo; hain zuzen ere, Zinbulu dantza bertikala elkartea osatzen duten bost partaideak. Lan egiteko modu argi batekin sortutako elkarte independente bat da, beraien proiektuak sortu eta ikuskizunak eskaintzeko asmoz errotua. Horrez gain, deskribapen bidez zaila eta ikusteko liluragarria den dantza modalitate honen klaseak ematen dituzte, nahi duen orori dantza bertikala ezagutzera gonbidatu eta erakusteko asmoz.
Iturria: Beñat Bidegain
Elkarteak ibilbide laburra duen arren, urteetako esperientzia dute soinean taldeko partaideek, elkartea sortu aurretik, beste proiektu batzuetan ibili baitira eta beste batzuentzat lanak egiten ere. Baina orain, elkartearen helburua beraien proiektu propioak ezagutzera ematea da, eta prozesu zail horretan daude buru belarri. Bizi jokoa izeneko ikuskizuna izan zen taldearen lehenengo lana, frontoia, esku pilota eta zesta punta oinarri hartutako ikuskizuna. Eta horren ondoren, bigarren lana etorri zen, Errotzen izenekoa. Urte beteko sormen lanaren ondoren 2021eko Umore Azokan aurkeztu zuten, eta hori da orain mugitzen ari diren proiektua.
Euskarri bat dagoen bitartean edozein bilakatu daiteke ikuskizun leku
Askatasuna. Argi ikus daitekeen bezala, dantza bertikala oso bisuala da. Horrek bere alde onak eta txarrak ditu. Kanpoaldeetan egiten da dantza modalitate hau, horrek dakarren arazo eta onura. guztiekin. Argiztapen baten beharra darama, eta kanpoaldeak argiztatzeko baldintzak eta beharrak kontuan izan behar dira. Bestalde, kaleak duen gauza txarretako bat eguraldia da, beti bere menpe egotea. Euria egiten badu, ia gehienetan bertan behera geratzen da ikuskizuna. Baina abantailak ere asko dira.
Edozein horma erabili dezakete dantza egiteko. Euskarri bat dagoen bitartean edozein leku izan daiteke ikuskizun leku, etxebizitza, ikastetxe, natur gune… nahi adina leku daude egiteko. Altura da dantza egokitzen duen elementua, altuerak zintzilikatuta dauden sokak ematen dioten penduluaren neurriak baldintzatzen baititu; altuera txikia bada askoz bizkorragoa izango da dantza, eta alderantziz, pendulua zenbat eta handiagoa izan, are askatasun gehiago dute.
Lehen aldiz probatzean gogorra egiten dela aitortu duten arren, denborak eta praktikak gozatzeko ahalmena ere ematen duela adierazi dute taldekideek. Dantza lurretik airera eramateko aukera eskaintzen du, eta askatasuna are handiagoa da, aireak, hormak eta gorputzak bat egiten dute.
