Arraun Lagunak eta Orio nagusitu dira Lekeitioko uretan
Lekeitioko bandera segundo bat baino gutxiagoan erabaki da emakumezkoetan zein gizonezkoetan.
Ikuskizun handia eskaini zuen atzo [ekainak 5] Lekeitioko banderak, gero eta gutxiago falta da txapelketa ofizialei hasiera emateko eta berdintasuna izan zen nagusi uretan. Gozatua hartu zuten portuko eta inguruko ikusleek.
Emakumezkoetan, Arraun Lagunaken eta Orioren arteko lehia ikusgarria izan zen. Ezin izan ziren berdinduago egon estropada osoan zehar, ziaboga bakarrean denbora bera ezarri zuten eta guzti, 5 minutu eta 33 segundo. Euskotren Ligako txapeldunak eta azpitxapeldunak prest daude beste lehiaketa bikain bat osatzeko, nor baino nor beste behin. Azken txanpan, berriz, Arraun Lagunakekoak irabazi zuten, baina 31 ehunenengatik bakarrik.
Hirugarren izan zen 13 segundora Donostiarra eta eguneko ezuste nagusietako bat bigarren txandan aritu zen Hondarribiaren laugarren postua izan zen ohorezko txandako Tolosaldearen aurretik. Azken hauek gailendu ziren ligako iazko jaitsierako playoffetan. Ondarroa zortzigarren izan zen 56 segundora, aurretik izan zituen Deustu eta Hibaika, irabazlearengandik 38 eta 46 segundora hurrenez hurren, eta atzetik Zumaia eta Portugalete, 59 segundo eta 2 minutu eta 13 segundora.
Gizonezkoetan ere ez zen emozioa falta izan. Oriok, berriz, balekoa hartu zuen eta garaipena erdietsi zuten Hondarribiaren aurretik, 29 ehunenera geratu zen Ama Guadalupekoa. Lehia bizia izan zuten bi traineru gipuzkoarrek, baina betiere oriotarrak aurretik zeudela, bi segundoko tartea zuten lehen eta bigarren ziabogan. Oriok ez zuen estropada apurtzeko gaitasunik izan eta azken txanpan erabaki zen txapelduna. Hor ere agertu zen Bermeoren aurreko txandako erreferentzia, bizkaitarrek azken luze bikaina egin zuten eta azkenean hirugarren geratu ziren segundo bat eta 62 ehunenetara.
Azkenaurreko txanda horretan bigarren izan zen Isuntza, marka ona ezarri zuen etxekoen aurrean Lekittarrak, sailkapenean bosgarren postua eskuratu zuen Orio irabazlearengandik 18 segundora. Ondarroak ere txanda berean parte hartu zuen eta oro har zortzigarren izan zen 34 segundora. Mutriku lehen txandan aritu zen Portugaleteren aurka eta txanda irabazi zion, azkenean 19. postua eskuratu zuten mutrikuarrek Oriok baino minutu bat eta 43 segundo gehiago behar izan zituzten lau luzeak osatzeko.
