Gizon bat atxilotu dute Berriatuan, marihuana-plantazio baten ustezko arduraduna izatea egotzita
'Kupela' izena jarri dioten ikerketa-operatiboa joan den maiatzean jarri zuten abian Ertzaintzak. 3.000 marihuana-landarez osatutako legez kanpoko instalazio bat aurkitu dute eraikin batean.
Ertzaintzak gizon bat atxilotu zuen joan den barikuan [ekainak 10] Berriatuan, osasun publikoaren aurkako delitu bat egotzita. Segurtasun Sailak jakinarazi duenez, 3.000 landarez eta landareak hazteko eta eraldatzeko azpiegituraz osatutako marihuana-plantazio baten ustezko arduraduna da.
Kupela izena jarri dioten ikerketa-operatiboa joan den maiatzean jarri zuten abian Ertzaintzak. Zehaztu dutenez, zaintza-dispositibo bat ezarri zuen Berriatuko eraikin baten inguruan, osasun publikoaren kontrako delituren bat egiten ari zitezkeela susmatuta.
Berriatuko eraikinean aurkitutako marihuana-landare plantazioa. Argazkia: Ertzaintza
Eguen [ekainak 9] goizean, Ertzaintzako baliabideak eraikinean sartu eta miaketa egin zuten. Azaldu dutenez, barruan 3.000 bat marihuana-landare aurkitu zituzten loratuta, bai eta lanparak, hezetasun kengailuak, sorgailu elektriko bat eta landareak hazteko eta eraldatzeko beharrezko azpiegitura guztia ere. “Gainera, miaketan su-arma bat ere aurkitu zuten”, zehaztu du Segurtasun Sailak.
Ikuskapenaren ondoren, agenteek gizon bat atxilotu zuten, plantazioaren ustezko arduraduna izateagatik, eta Ertzaintzaren egoitzara eraman zuten beharrezko polizia-eginbideak betetzeko. Ikerketak zabalik jarraitzen du, eta ez dute baztertzen atxiloketa gehiago egitea.
Berriatuko eraikinean aurkitutako marihuana-landare plantazioa. Argazkia: Ertzaintza
