Lekeitioko Udalak Isuntza hondartzako irisgarritasuna hobetu du
Gaur [ekainak 24] egin duten aurkezpen ekitaldian Vicente Reyes Gobernuaren Bizkaiko ordezkariordeak parte hartu du
Lekeitioko Udala azken urteetan gogor ekin dio Isuntzako sarreren hobekuntzari, Mendieta ontziolakoari batez ere. Gaur [ekainak 24] egin dute irisgarritasuna hobetuko duen sarbide berriaren aurkezpena Koldo Goitia Lekeitioko alkateak eta Vicente Reyes Gobernuaren Bizkaiko ordezkariordeak.
Orain arte Isuntzara hondartzara heltzeko bide bakarra bertako aldapa handia zen. “Gaur da eguna non pozik egon gaitezen Isuntza hondartza lehen baino irisgarriagoa delako lan hauei esker, batez ere mugikortasun arazoak dituzten pertsonentzako”, adierazi du Goitiak. Lanak aurrera eramateko udala Espainiako Gobernuko Trantsizio ekologikoko ministeritzarekin aritu da elkarlanean. “Udalaren laguntzari esker toki bat birsortu dugu, natura berreskuratu eta herritarrei hondartzarako sarbidea hobetu”, zehaztu du Reyesek. Guztira 850.000 euro inbertitu dituzte hondartzako sarreran.
Gobernuko ordezkariak esan du lan hauek “oso garrantzitsuak” direla, herritarrek “gero eta gehiago” eskatzen dituztelako espazio naturalak. “Helburua da euskal kostaldea berriro ahalik eta naturalena izatea, denek hobekien erabiltzeko modukoa, betiere gure ingurua zaintzen”, esan du. Azken urteetan proiektu asko garatu dituzte Bizkaian, besteak beste, Urdaibaien, guztira bi milioi euro baino gehiago inbertituz. Biek ala biek eragileen arteko “elkarlana eta lankidetza” goraipatu dute.
Era berean, Mendieta Ontziola berreskuratzeko lanak aurrera doaz eta dagoeneko hirugarren fasean daude sartuta. Koldo Goitiak aurreratu duenez, “helburua da berrerabiltzea, zerbitzuak ematea bai Isuntza hondartzari baita ontziolari ere”. Proiektu honetarako ere ministeritzagaz elkarlanean ari da udala eta obrak “bide onetik” doazela esan dute.
