San Joan Egunak dantza, musika eta kolorea ekarri ditu Aulestiko plazara
22. Sobra Sariketa lehiatu da, eta herriko dantzariek erakustaldi dotorea eskaini dute plazan.
Gau alai baten ondoren, plazan elkartu dira gaur [ekainak 24] aulestiarrak, jaiari jarraipena emateko. Atzo [ekainak 23] bota zuten txupina, eta San Joan bezperan ohikoa denez, parkean sua piztu eta haren inguruan egin zuten jaia, buruhandi, musika eta dantzez lagunduta. Gazte Asanblada izan zen txupina botatzearen arduraduna.
Gaur, berriz, herriko dantzariak eta herritarren egindako sobrak izan dira protagonistak. Ohi modura, meza ostean entregatu dituzte sobrak parte hartzaileek, plazan prest zegoen mahaian, eta herriko dantzariek erakustaldia egin bitartean, egin du aukeraketa epaimahaiak. Guztira, 45 sobra aurkeztu dira aurten lehiaketara, eta banan-banan aztertu dituzte guztiak Karmele Goitiandia eta Antxone Aranzeta epaimahaiko kideek.
Esperientzia badaukate; biek urteak daramatzate sariketako epaimahai jardunean: hamabostetik gora Goitiandiak eta sei baino gehiago Aranzetak. Hala ere, ez dute lan erraza eduki, urtero modura, txorta ikusgarriak aurkeztu dituzte-eta herritarrek txapelketara. Azaldu dutenez, zalantzan egon dira biren artean, baina sariketarako eskatzen diren baldintza gehien betetzen zituenaren alde egin dute. “Sobrak artoa, garia, ortuariak eta fruta edukitzea da puntu gehien ematen duena”, argitu dute.
[zuzenean ARGAZKI GALERIA IKUSI]
Ohi modura, seik eraman dute saria; lehenengo hiru sari eta bigarrengo hiru sari banatu dituzte. Aurtengo irabazleak Antoni Zelaia, Izaro Aranburu eta Mertxe Gerenabarrena izan dira, eta bigarren saria Eider Arriagak, Maite Martiartuk eta Encarna Anituak eraman dute.
Sobra sariketako irabazleak, epaimahaikideak eta udal ordezkariak, sariketako sari banaketaren ostean.
Irabazleen sariez gain, parte hartzaile guztientzako egon da oparia; landara bat eraman dute etxera.
Erakustaldia. Sobrak ez dira izan, baina, gaurko egunari kolorea eta alaitasuna eman dioten bakarrak. Aulestiko ume eta gazteek dantzaldi ederra eskaini dute plazan. Era askotako dantzak atera dituzte plazara dantzari txiki eta gazteek: Agintariarena, Txotxongilo, Ezpata joko, Txantxoak, Marmutx, San Petrike, Txulalai, Zortziko, Binango, Launako, Zartain dantza, Zintxa dantza eta Arku dantza, eta amaitzeko, borobila.
Abarketaren bat ere galdu arren, umore onez eta gogotsu egin dute dantzan txikienek ere, eta guztiek jaso dute merezitako txalo zaparrada.
Plazatik frontoira igaro da arratsaldean jaia. Pilota partidak jokatu dira Torrezelai frontoian. Bihar [ekainak 25] ere frontoia izango dute bilgune aulestiarrek. Biharko euria iragarrita dagoenez, bertara lekualdatu dute herri bazkaria. [hemen EGITARAUA]
