LeartiADI SOS Taldeak Espainiako Kopa lehiatuko du
LeartiADI SOS Taldeak Castroko Oriñon hondartzan burutuko den Espainiako Salbamendu eta Sorospen Kopan parte hartuko du zapatuan [uztailak 2].
Lehenengo aldiz lehiatuko dute Espainiako Kopa batean, eta hain zuzen ere kadeteen mailako 15 neska mutil joango dira Castrora lehiatzera, eta hiru modalitatetan parte hartuko dute ondarrutarrek:
- Hondarreko ariketa bat egingo dute, “banderen jokoa”. 16 bandera ezartzen dira hondarrean, eta 15 metrora kokatzen dira kirolariak etzanda.
- Bigarrena, surf igerian. Froga honetan, kirolariak korrika ateratzen dira hondartzatik, eta 200 metroko ibilbide bat igerian egiten dute, olatu artean.
- Hirugarren froga, lasterketa izango da salbamenduko taularekin.
09:00etan emango diote hasiera txapelketari, eta Iñaki Iturri entrenatzaileak adierazi duenez lehenengo kontaktua izango da gazteentzat eta helburu bakarra gozatzea izango da: “Haurrak eta gurasoak oso motibatuta daude, baina presio barik goaz, ondo pasatzeara”.
LeartiADI
Duela hiru urte sortu zuten LeartiADI SOS Kirol Kluba eta gutxinaka geroz eta haur eta gazte gehiago dituztela aitortu du Iturrik: “Salbamendua eta sorospena ez dira soilik profesionalki lantzen diren modalitateak, kirol modalitate bat ere bada, eta hori ezagutzera eman nahi dugu. Gutxika lortzen ari gara”. Zazpi urtetik gorako umeak eta gazteak daude taldean, eta teknika profesionalak ikasten dituzten arren, kirol modalitatea praktikatzen dute, eta orain, baita lehiatu ere.
