Berriatuko San Pedro Egunean esku pilota izan da protagonista
Gaur [ekainak 29] frontoi txikian gazte eta nagusien maila bi partida jokatu dituzte.
Berriatuan ere gogotik ospatu dute San Pedro jaietako egun handia. Gazte eta nagusien mailako esku pilota partidak jokatu dituzte frontoi txikian. Gozatua hartu dute ikusleek maila handiko bi partida ikusi ahal izan dituzte, oso berdinduak gainera.
Gazte mailan Anartz Ibarloza markina-xemeindarrak eta Ander Arroita galdakoztarrak Aner Iglesias zaratamoztarrak eta Aingeru Bernaola mañariarrak neurtu dituzte indarrak. Lehia oso berdindua izan da eta azken txanpan Iglesiasek eta Bernaolak lortu dute garaipena, 22-20. Nagusietan ere indarrak oso orekatuak egon dira. Josu Agirreamalloa markina-xemeindarrak eta Edorta Bilbao lezamarrak bikotea osatu dute joan den domekako Bizkaiko herriarteko finalean aurkari izan ostean. 22-18 irabazi dituzte Ander Etxegibel sestaotarra eta Maren Emaldi zeanuritarra.
Bitartean metro gutxi batzuetara, elizan, meza nagusia egin dute. Pixkanaka, orduak pasa ahala, hodeiak ugaritzen joan badira ere egitaraua aurrera eramatea lortu dute.
