'Transmaribollook herrixetan ere harro'
Lea Artibai eta Mutrikuko transmaribollo sareak deituta manifestazioa egin zen atzo [ekainak 28] Mutrikun, Andrabanda eta Marimatraka Batukada Feministarekin batera.
Sexu eta genero askapenaren aldeko borrokak koloreztatu zituen Mutrikuko kaleak, hain zuzen ere, LGTBI Komunitatearen Nazioarteko Egunean. Goiko Plazan hasiera eman eta herria zeharkatu zuen kolorez jantzitako jendetzak, danbor soinu eta aldarri oihu artean, txoko guztiak hartu zituen askapenaren iraultzak.
Bideak aurrera egin ahala jendea batuz joan zen, Lea Artibai eta Mutrikuko transmaribollo sareak deitutako manifestazioak. Andrabandak eta Marimatraka Batukada Feministak erritmo paregabea eman zion jardunari, giroa ezarrita eta kalez kale zihoazenen aldarri oihuak bat eginda, “Harrotasunaren Eguna plazaratu eta kaleak hartu” zituzten.
Beheko plazara heltzean, sareko kideen esku geratu zen ahotsa, eta argitasunez hitz egin zuten: “1969.urtean Stonewallen poliziaren sarekada saiakeraren aurrean matxinatu ziren kolektiboko kideak, LGTB+ borrokarentzat mugarri bilakatuz data hau. Memoria historikoa dugu, borrokan jarraitzen dugu eta argi utzi nahi dugu gaurko elkarretaratze honen oinarria iraultzaile eta askatzailea dela”.
Ekimenaren oinarria sexu eta genero askapenak helburu izanik, PRIDE ekimena jarri zuten erdigunean: “Borroka hau xurgatzeko ahaleginean dabil, ahalmen eraldatzailea desaktibatuz: askapenaren ordez, diru etekina izanik helburu”. Adierazi zutenez, enpresa ezberdinek finantzatutako PRIDE ekimenak gizon zis homosexual zuri eta aberatsak ditu protagonista, “ertzetakoon zokoratzea” bultzatu, eta normaltasun patriarkala sendotzeko ahaleginean. Horren aurrean, zurrun oihukatu zuten: “Gure gorputz eta identitateak ez daude salgai!”.
Mutriku aukeratu zuen sareak eskualdeko ekimena burutzeko, hiriburuetan egiteko erabakia alboratuz, “ez dugu sexualitatea modu askean bizi behar izateko kanpora joan beharrik izan nahi. Hemen bizi gara, eta hemen aldarrikatu nahi dugu askapena”. Horretarako, herriak espazio seguruak bilakatu beharra erdigunean jarri zuten.
“Iraganean egon zirenei eta haien borrokari esker gara gu, eta guri eta gure borrokari esker etorriko dira hurrengo belaunaldiak. Zisheteroarauak kanporatu egin nahi gaitu eta erasotu egiten gaitu. Kapitalismoak aurrera eramaten dugun borroka saldu nahi du. Honen aurrean argi esan nahi dugu gurea borroka antikapitalista eta transfeminista dela eta hala izaten jarraituko duela, disidentzia garela eta harro gaudela.”
“Gora sexu eta genero askapenaren aldeko borroka!” oihukatuz, bide eman zioten jan edanari, eta jai giroan jarraitzeko aukera eskaini zioten nahi zuen orori.
