Arte garaikideko proposamen ezberdinen agertokia izango da Markina-Xemein
Arrakalan FX izenpean hainbat proposamen artistikok osatutako ekitaldia egongo da zapatuan [uztailak 2] herriko gune ezberdinetan.
Harriak arte garaikideko programan parte hartzen duten artisten proposamen ezberdinak ezagutzeko aukera egongo da beste urte batzez, Markina-Xemeinen. Arrakalan FX izenpean hainbat proposamen artistikok osatutako ekitaldia egongo da zapatuan [uztailak 2] herriko gune ezberdinetan. Besteak beste, soinua, poesia eta performancea jorratzen duten lanek osatuko dute ekitaldia.
Esperientzia Arretxinagako ermitan hasiko da 12:30ean, Eneko Borao barakaldarraren danza_venganza piezagaz, eta gero Uhagon kulturgunera abiatuko dira parte hartzaileak, 13:30ean, kulturgunearen ostean egingo den M. Benito Piriz durangarraren The Most DramatiC Panda EVER errezitalera. Leku berean izango da baita ere, 14:00etan, Myriam RZMren dimoztarraren Zarata Proto_Errituala kontzertua, eta ondoren, partaideek mokadutxoa hartzeko tartea edukiko dute kulturguneko terrazan.
Arretxinagako ermita izango da arratsaldean berriro ere Oviedoko (Asturias, Espainia) Javier R. Perez-Curielen Buscar refugio al abrigo del sincretismo performanceaz gozatzeko agertokia, 16:00etan izango da adierazpen artistikoa, eta esperientziagaz amaitzeko, kartzela zaharreko eraikina aukeratu dute. Kartzelan, Baila o muere zuzeneko saioa eskainiko du Alazne Lastra Crespo Arakn3 bilbotarrak, 17:00etan.
Dibulgaziorako programa. Herri txikietan sorkuntza garaikidearekiko sentiberatasuna bultzatzera eta artearen inguruko lan eta gogoeta prozesuak ikusaraztera bideratuta dago Harriak programa, eta Bizkaia, Gipuzkoa eta Arabako kultur etxeetako hainbat aretotan jorratuko da, gorabidean datozen artista eta bitartekarien partaidetzagaz. Obrak eta artistak batera abiatzen dira eta elkar elikatzen dute esperimentaziotik, gorputzetik, soinutik, afektuetatik eta soinu-efektuetatik.
