"Erabakitzeko eskubidearen argia piztuta dago"
Zapatuan [uztailak 2] Pirinioetako Bidea ekimena burutu zen, eta Gure Eskuk egindako balorazioaren arabera helburua lortu dute.
Pirinioetako Bidea, Gure Esku Dago. 2022ko uztailaren 2a, Txamantxoia menditik.
Argazkia: Ander Gillenea / Gure Esku Dago. Zapatuan [uztailak 2], katalanek eta euskal herritarrek 300 gailurretik gora argiztatu zituzten Pirinioetan, Euskal Herria eta Katalunia batuz, autodeterminazio eskubidea aldarrikatuz. Pirinioetako Bidea deituriko ekimena Jaizkibeletik Cap de Creusera bitartean dauden Pirinioen mendikatean argi-lerro erraldoi bat osatzea izan zen, eta hainbat izan ziren Lea- Artibai, Mutriku eta Busturialdetik joan zirenak ekimenagaz bat egiteara. Autobusez naiz autoz, guztiak batera helburu bakar bategaz.
Gaur [uztailak 4] Pirinioetako Bidea ekimenaren balorazioa egin dute Donostian, hain zuzen ere Josu Etxaburu ondarrutarrak eta Amalur Alvarez Gure Eskuren bozeramaileek: “Gailurretan bizitakoa gure memoria kolektiboan eta bihotzetan geratuko da, eta burujabetza osoaren alde aktibatu behar dugu euskal herritarrok”.
“Gau magikoa” bezala definitu duen zapatu gaua. “Pentsatze hutsa euskal herritar asko etxetik 300 kilometrotara joan direla hirumilako bat egin eta gailurrean argia piztera… hunkigarria da. Itzela da!” gehitu dute bozeramaileek. Itxaropen argiak piztea lortu du ekimenak, hain zuzen ere, herri gogoa hauspotzeko asmoz jarri zuten erroka, eta “uste dugu lortu dugula”. Pirinioetako gailurretan jarritako argi bakoitza euskal herriaren burujabetza eta askatasunaren bidea argiztatzen duen izar bat dela esanik laburbildu dute: “Erabakitzeko eskubidearen argia piztuta dago”.
Aitzakiak aipatu dituzte, ekimenak bultzatzeko orduan, giroa, baldintzak, une egokia… hainbat faktorek eragiten ohi dute, baina hain zuzen ere aipatutako guzti horri buelta ematea lortu zuten zapatu gauean, “milaka eta milaka herritarrok argi adierazi dugu baietz: badela giroa, baldintzak guk sortuko ditugula, eta herri hau anbizioz jokatzeko prest dagoela”. Pirinioetako 300 gailur argiztatu dituzte, eta argi utzi nahi izan dute bideak jarraitu egin behar duela.
Zortzimilakoa erdigunean
Nicola Sturgeon Eskoziako lehen ministroak erdigunean jarri zuen erronka gogorarazi dute, independentziaren bigarren erreferendumari data jarri zion. Lehen ministroaren anbizioa goraipatu eta helburu bat izatearen beharra aipatu dute, bidea zaila izanda ere, “plan” bat izatearen beharra, “guk, euskaldunok, badugu planik?“
“Gure buruari galdetu beharko genioke, orain ez bada, noiz izango den une aproposa. Olatu demokratizatzaile berri bat etor liteke Europatik, eta ez genuke nahi olatu horrek hondartzan harrapatzerik. Igerian behar genuke olatua iristen denean”. Gure Eskuren helburuak kontuan izanik, datozen hilabeteetan irmoki lanean jarraituko dutela adierazi dute, erabakitzeko prozesu bat landu, adostu eta sustatuz.
Bozeramaileek euskal herritar guztiei dei egin diete, burujabetzaren alde aktibatzera: “Bidea urratzeko, ez baita nahikoa ekintza handi bat; eguneroko jarduna da gailurrera eramango gaituena. Burujabetzarako espedizio honek herri mugimendu indartsu bat behar du; kidego aktiboa eta bazkidego sendoa. Denon artean, urratsez- urrats, zortzimilakoa ere egingo dugu”.
