Aste honetan hasiko dira Markina-Xemeingo danborradako entseguak
Markina-Xemeingo Guraso Elkarteak talde bakoitzaren egunak eta orduak ezagutzera eman ditu. Entseguak eguenean [uztailak 7] hasiko dira.
Markina-Xemeingo 2019ko Karmen Jaietako danborrada. Uztailaren 15ean Markina-Xemeingo kaleak zeharkatuko dituen danborradarako argibideak eman ditu Markina-Xemeingo Guraso Elkarteak. Entseguak eguenean [uztailak 7] hasiko dira eta talde bakoitzaren entsegu egunak eta ordutegiak argitu dituzte.
Uztailaren 14ko entsegu orokorra izan ezik, beste guztiak kultur aretoan izango dira:
- Uztailaren 7an, 8an, 11an, 12an eta 13an edukiko dituzte entseguak kultur aretoan LH1etik LH6ra arteko ume eta gaztetxoek. LH1 eta LH2 mailetakoek 19:00etatik 19:30era, LH3 eta LH4koek 19:30etik 20:00etara eta LH5 eta LH6koek 20:00etatik 20:30era.
- Uztailaren 11an, 12an eta 13an dute entsegua DBH mailetako ikasleek eta helduek 20:00etatik 20:30era.
- Uztailaren 14n entsegu orokorra egingo da talde guztiekin Bekobenta eskolan, 19:00etan. HH5 mailako ikasleak egun horretako entsegura agertu behar direla zehaztu dute antolatzaileek. Danborra jo behar duten guztiek larruzko gerrikoa eraman behar dute entsegura. Egun horretan banatuko dizkiete danborrak partaide bakoitzari.
- Uztailaren 15ean izango da danborrada, 21:00etan. Hala ere, 20:30erako talde guztiak egon behar dira Gaztetxe aurrean.
Arropak, berriz, txalekoa eta txapela, uztailaren 12an eta 13an banatuko dituzte. Uztailaren 12an banatuko diete DBH eta helduen taldekoei eta beste guztiei, berriz, uztailaren 13an, bakoitzari dagokion entsegua amaitzen denean. HH5ekoek uztailaren 13an, 19:00etan jaso behar dituzte arropak.
Txaleko eta txapelagaz gainera, danborrada egunean zuriz jantzita joan behar dira partaideak, praka luze edo gona zuriekin eta oinetakoak ere zuriak. Pelotariek, gainera, pala, zesta edo pilota eraman behar dute.
Danborrada amaitutakoan, ume gazte eta nagusiak herri biblioteka aurrera joango dira Guraso Elkartekoek lagunduta, eta bertan itzuli beharko dizkiete txaleko, txapel, danbor eta makilak Guraso Elkarteko kideei.
