Garbiketa sektorearen negoziazio mahaian ez da hitzarmenik lortu
Bizkaiko garbitzaileen sektoreak gaur [uztailak 6] izan du hemeretzigarren bilera patronalagaz, eta ez da hitzarmenik lortu alderdien artean.
Gaur [uztailak 6] 10:00etan eman diote hasiera Bizkaiko hitzarmena sinatzeko bidean garbiketaren sektoreak egin duen hemeretzigarren bilerari. Sindikatuak eta patronala bildu dira, baina alderdien artean ez da akordiorik lortu.
Garbitzaileen egoerak hobekuntza nabarmenak behar dituela argi izanik, negoziazio mahaian jarri baino lehenago egindako greba deitzaleek eskaera finko bat zuten: 1.200 x15eko soldatak lortzea. “Bizkaiko langileen soldatak ez dira 16.000 eurotara iristen, eta gehienek jardunaldi partzialak dituzte. Izan ere, emakumeen % 70ak lanaldi partzialeko kontratuak ditu, eta hori areagotzen ari da. Lanaldi osoko langile gehienak nagusiak dira, eta kontratazio berriak lanaldi partzialekoak dira”, azaldu du ELA sindikatuak. Gainera, eraikinetako garbiketako sektorea da soldata arrakala handiena pairatzen duenetako bat. Izan ere, gizonak nagusi diren kale garbikuntzarekin erkatuz gero, eraikinetako garbitzaileek %45 gutxiago irabazten dute.
Sindikatuen eskaera zein izan den ikusirik, patronalak hurrengo proposamen igoerak jarri ditu mahai gainean: 2021 igoerarik eza, 2022ko uztailetik aurrera %3ko igoera, 2023ko urtarrilean %2ko igoera, eta irailetik aurrera %3,5ko igoera. 2024an, uztailetik aurrera 18.000 eurotara iristea. Soldatei dagokionez egindako proposamena izan da, eta gainerako aldarrikapenei buruz ez da ezer berririk proposatu.
Hortaz, ELA sindikatuak nabarmendu du patronalaren eskaintza oso urrun gelditzen dela, eta hitzarmenak jasotzen ez dituen eta jaso beharko zituen gainerako alderdiei buruz hitz egin behar dela, esaterako, bakanteei buruz: “Bistakoa da patronalak eskainitako eskaintza ez dela sindikatu honek aldarrikatzen dituen gutxiengoetara iristen. Izatez, ezin dugu ulertu 2021. urtean igoera %0an gelditzea edo gainerako igoera uztailean kokatzea, urtarrilean izan ordez”.
Hurrengo negoziazio mahaia uztailaren 15ean izango da, 11:00tan. “Espero dugu egun horretarako patronalak euren eskaintza errebisatuta izatea eta beste eskaintza bategaz etortzea”.
